Jennifer Lopez ka qenë një nga figurat kryesore të kulturës pop për 30 vite me radhë. Asnjëherë nuk është lodhur dhe sa më shumë kalon koha aq më shumë njerëzit e duan dhe ndonëse 51 vjeç duket akoma kaq e re dhe e freskët.
“Ku po e fsheh burimin e rinisë? Pse dukesh njësoj siç dukeshe në vitin 2003?”, ishte pyetja e Affleck, ish-partnerit të J-Lo-së për këngëtaren në revistën “Instyle”.
Kujtojmë se Affleck dhe Jennifer Lopez u takuan në sheshxhirimet e filmit “Gigli”, në vitin 2001, dhe u fejuan në vitin 2002. Ndërkohë në vitin 2004 ata i dhanë fund fejesës tepër miqësisht.
“Mendoja se isha korrekt në punë, por u mahnita nga sa punonte ajo nga dita në ditë. Ajo ishte shumë serioze, e qetë dhe e dedikuar. Edhe sot vazhdon të jetë një person që punon fort për sukses dhe jam i lumtur që ka marrë atë çfarë meriton”, ka thënë aktori për J.Lo-në.
Për revistën “InStyle” J.Lo ka folur edhe për jetën si nënë. Ajo është shprehur se ndjehet gjithmonë fajtore kur i duhet të punojë dhe nuk mund të kujdeset për fëmijët.
“Duhet të gjesh balancën dhe unë përpiqem të bëj më të mirën e mundshme. Nuk ka rëndësi nëse jam në një vend tjetër apo në shtëpi, ne komunikojmë gjithë kohës, qeshim dhe kalojmë kohë bashkë. Dhe ndonjëherë madje i bezdis duke ju larë dhëmbët, duke i zgjuar për në shkollë, me gjithë gjërat që duhet të bëjnë. Nuk mund të filloj t’i listoj gjërat që fëmijët më kanë mësuar për veten time. Më duhet të shkruaj një libër të tërë për këtë gjë”, ka thënë Jennifer.
