Ditën e sotme, më 25 Mars, nis zyrtarisht muaji i fushatës elektorale për zgjedhjet e 25 Prillit.
Partia Socialiste dhe Partia Demokratike do të hapin fushatën pasditen e sotme, e cila ndryshe nga vitet e tjera, do të mbahet në kushtet e pandemisë Covid-19.
E para që hap sot fushatën do të jetë Partia Socialiste, në orën 17:00 në sheshin “Skënderbej”, ndërsa gjysmë ore më vonë do të çelë fushatën koalicioni opozitar, në sheshin “Nënë Tereza”.
Ndryshe nga herët e tjera, këto tubime parashikohen të zbatojnë distancimin social, pas masave të marra nga Komiteti Teknik i Ekspertëve për situatën në vendin tonë, i cili në fakt ndalon tubimet dhe grumbullimet më shumë se 10 persona.
“Komiteti ka vendosur që masat që kanë qenë të efektshme, të mbeten enë të njëjtin nivel edhe për dy javë të tjera. Vijon të jetë e njëjta orë policore”, tha Rakacolli gjatë ditës së djeshme, gjatë njoftimit të masave.
Delegacioni i BE-së u ka bërë thirrje partive politike që të mos përdorin gjuhë urrejtje dhe retorikë provokuese, si dhe për zgjedhje transparente, gjithëpërfshirëse dhe të ndershme.
Por, si do të zhvillohet kjo fushatë në kushtet e Covid-19?
Deri tani bëhet e ditur se fushata do të ketë mbulim nga media dhe do të mungojnë qytetarët, ndërkohë që është menduar që sheshet të mbushen me karrige ku do të qëndrojnë në distancë kandidatët për deputetë, duke zbatuar rregullat e pandemisë.
Por, sa do të zbatohen rregullat Covid-19 në këtë fushatë të pazakontë në kushte pandemie? Kjo mbetet për t’u parë gjatë orëve në vijim të ditës së sotme.
