Në dhjetor të vitit të shkuar, u raportua se Bujar Qamili ishte në gjendje të rëndë për shkak të infektimit me Covid-19. Media raportoi se ai ndodhej në terapi intensive në spitalin Infektiv. Thuhej se artisti po merrte ndihmën mjekësore nga mjekët dhe infermierët e spitalit.
Mirëpo miku i tij, Ramazan Çeka, u shpreh në një intervistë për “abcnews.al” se Qamili ishte në gjendje të mirë dhe se lajmet që dolën ishin mashtrime.
“Lajmet e përhapura në media nuk janë të vërteta, mashtrime. Nuk është e vërtetë që Bujar Qamili është në gjendje të rëndë nga covidi. Unë përpara 5 minutash fola në telefon dhe ishte shumë mirë.
Është si kokrra e mollës. Ka pasur një problem me veshkat gjatë qëndrimit në Itali, por tani është shumë mirë” tha Çeka.
Ndërkohë së fundmi vetë Bujar Qamili ka treguar se ai ka qenë i infektuar me Covid-19 dhe madje në gjendje shumë të vështirë shëndetësore. Në një intervistë për televizionin lokal “TV1 Channel” në Shkodër, këngëtari është shprehur se ka qenë aq rëndë sa dëshironte të mos ishte më në jetë.
“Isha i infektuar me Covid, kam kaluar situatën më të vështirë të jetës sime, ishte një traumë për të cilën thosha me vete më mirë të mos jem më aq e rëndë ishte. Tani jam më mirë, jam rikuperuar. Kam një thirrje të fortë për të gjithë që të mbajnë maska e të mbajnë distancimin social, pasi vetëm kush e ka kaluar e di se për çfarë po flas”, ka thënë Qamili në një lidhje live nga Italia.
