Ndahet nga jeta në moshën 82-vjeçare bilbili i këngës popullore qytetare, Naile Hoxha.
Këngëtarja e mirënjohur e muzikës popullore shqiptare ndërroi jetë në qytetin e Shkodrës, në azilin e të moshuarve, duke lënë pas një karrierë mbi 60-vjeçare në skenë dhe një repertor të pasur, kryesisht me këngë popullore.
Naile Hoxha nisi rrugën e muzikës në qytetin e saj të lindjes, kur ajo ishte vetëm 13 vjeç, ndërsa shumë shpejt do të bëhej e dashur për publikun përmes zërit melodioz dhe këngëve të shumta, si “Xhamadanin kuq si gjaku”, “Moj e mir synin larush”, “Djal i dashtun” e shumë të tjera. Naile Hoxha mban titullin “Artiste e Merituar”, ndërsa ishte pjesë e Ansamblit të Këngëve dhe Valleve Popullore dhe një ndër këngëtaret e preferuara të regjimit të asaj kohe.
Homazhet në nderim të këngëtares do të zhvillohen të martën nga ora 11:00 deri në 13:00 në Bashkinë e Shkodrës.
Biografia
Naile Hoxha “Artiste e Merituar”, lindi në Shkodër më 31 Dhjetor 1934. Filloi të këndonte në një moshë të vogël me babanë e saj. Shumë shpejt ajo u bë pjesë e një grupi të njohur artistësh si: Lucie Miloti, Bik Ndoja, Ibrahim Tukici, Xhevdet Hafizi.
Mori pjesë në koncerte të ndryshme në Shkodër, si dhe në Radio Shkodra ku regjistroi edhe këngët e saj të para. Rreth 4-5 vite më vonë, në moshën 18-vjeçare, bashkë me familjen e saj të sapo krijuar, transferohet në Tirane ku fillon e këndon në atë kohë me Estradën e Tiranës dhe ma pas në Ansamblin e Këngëve dhe Valleve Popullore.
Ka interpretuar shumë kënge popullore, si “Djalë i dashtun” “Xhamadani Kuq si Gjaku”, “Moj e Mira Synin Larush”, “Seç po Fryn nji Fllad Prandvere” “Ani moj Hatixhe” “Oj Zog-o” e shumë e shumë këngë të tjera.
Ajo u nderua me titullin “Artiste e Merituar” rreth viteve 1973-74. Gjithashtu në vitin 2012 në kuadrin e 100-vjetorit të Pavarësisë, u nderua me Certifikatë “Mirënjohje” nga Prefektura Shkodër.
“Kanga popullore ka kenë arma ma e mirë në duert e mia si artiste. Kangën e kam këndue me shpirt e zemër për me kënaqe tanë dashamiret e saj!”- është shprehur ajo.
Interpretimi i saj i fundit live do përmendet në Maj të vitit 2015, si e ftuar nderi në koncertin e këngëtares Albana Fani, ku Naile Hoxha këndoi “Djalë i dashtun”.
Në një intervistë së fundmi, Naile Hoxha tregoi se ishte këngëtarja e preferuar e Enver Hoxhës, i cili i ndihmoi që të vinte në Tiranë bashkë me të fejuarin për t’u martuar dhe për të nisur jetën bashkë.
