Dyshja më e njohur e muzikës, Daft Punk, i ka dhënë fund bashkëpunimit pas 28 vitesh. DJ-të francezë, emrat e vërtetë të të cilëve janë Thomas Bangalter dhe Guy-Manuel de Homem-Christo, njoftuan ndarjen e tyre në një video 8 minuta me titull “Epilog”, e cila u postua në YouTube. Në video të dy ata kanë fshehur identitetin e tyre, duke u shfaqur si robotë.
Videoja përfundoi me imazhin e një dore floriri dhe një tjetër argjendi, që formojë formën e një trekëndëshi me vitet 1993-2021. Kjo ndarje artistike është konfirmuar edhe nga përfaqësues të Daft Punk, për E! News, por nuk është dhënë asnjë detaj më tepër.
Gjatë karrierës së tyre, Daft Punk patën shumë sukses, për shkak të shumëllojshmërisë së projekteve dhe hiteve të tyre. Përveçse regjistruan një album në vitin 2010 për filim “Tron: Legacy”, dyshja sollën hite të shumta si “One More Time”, “Robot Rock” apo “Get Lucky” në bashkëpunim me Pharell Williams.
Dyshja Daft Punk fitoi dhe disa çmime “Grammy”, duke përfshirë “Albumi i vitit” në 2014 për “Random Access Memories”. Që atëherë, ata kanë bashkëpunuar pak me The Weeknd, por duke qenë se ka kaluar kohë, fansat janë ende të paqartë për ndarjen.
Shumë e kanë cilësuar këtë ndarje të dyshes si fundin e një epoke dhe fansat e Daft Punk në rrjete sociale kanë reaguar shumë të mërzitur.
