Organizata Qëndresa Qytetare ka sjellë në formën më të veçantë 11 heronjtë e Shqipërisë për të dhënë një mesazh për korrupsionin. Gjergj Kastriot Skënderbeu, Nënë Tereza, Ismail Qemali, Shote Galica, Musine Kokalari etj, janë paraqitur si një siluetë për t’u ekspozuar në Kalanë e Tiranës.
Përfaqësuesit e Qëndresës Qytetare kanë shënuar mbi secilën prej tyre nga një mesazh, që u drejtohet qytetarëve e jo vetëm. Të gjithë mesazhet e përcjella kanë në fokus korrupsionin në vend dhe çfarë duhet të ndryshojë që gjërat të funksionojnë siç duhet. Përmes mesazheve heronjtë, që kanë lënë gjurmë në vendin tonë, kërkojnë një premtim nga cilido që do të firmosë mbi siluetën e tyre.
Aktivisti Migen Qiraxhi është shprehur se përmes kësaj ekspozite ata synojnë që të ndërgjegjësojnë dhe të krijojnë një debat publik për çështjet që lihen në harresë.
“Ajo që do donim është që të ndërgjegjësonim dhe të krijonim një hapësirë për një debat publik për ato çështje që më së paku debatohet. Ne jemi të bombarduar nga rastet korruptive, si koncesionet, tenderët apo aksione politiket, që shpesh i komentojmë jo në të mirë të interesit publik”, thotë ai.
Aktivisti ka shtuar se ata kanë si qëllim që njohjen e të rinjve shqiptarë me këto figura të rëndësishme, që kanë dhënë një kontribut shumë të madh në historinë e vendit tonë.
“Ne jemi jo vetëm në një komunikimin për çështjen e korrupsionit, por edhe për të përçuar tek të rinjtë shqiptarë kontributin e këtyre figurave, që duhet të njihet. E kemi pas të vështirë me siluetën e Musine Kokalarit, do të ishte edhe më e vështirë nëse do të realizonim edhe siluetën e Sabiha Kasimatit. Për të shmangur këtë mungesë njohurie, që kanë të rinjtë kemi zgjedhur ato figura, portretet e të cilave janë të dallueshme”.
