Kryeministri Edi Rama është baba i dy djemve, njëri prej të cilëve (Zaho) është vetëm 7 vjeç.
Mirëpo, momentet më të bukura të rritjes së tij, Rama po i humb për shkak të impenjimeve të mëdha si kryeministrër.
Nga Vlora, kreu i qeverisë tha sot se ka detyrim për t’i çuar gjërat deri në fund, por ka një dëshirë të vetme të cilën do të donte shumë ta realizonte.
”Unë e para një herë po të më pyesje për dëshirën, vetëm për dëshirën nëse do zhvishesha nga çdo gjë tjetër, e do ecja nga dëshira, të them të drejtën do kisha dashur të kthehesha në shtëpi pas kaq e kaq vitesh, në kuptimin më të mirë të fjalës. Po rritet djali i vogël, e le në gjumë dhe e gjej në gjumë në pjesën më të madhe të kohës. Kjo është pjesa e izoluar nga gjëja tjetër”, tha Rama.
Disa javë më parë, kryeministri realizoi një intervistë të gjatë dhe rrëfeu detaje të pathëna nga jeta e tij për emisionin “Opinion” të Blendi Fevziut.
Rama foli për marrëdhënien e tij me të atin, familjen, ish-politikanë e politikanë, e divorcet. Nisur nga kjo e fundit ai tha se nuk ka pasur kurrë marrëdhënie të vështirë me gratë.
Por, shtoi se ka pasur raporte që nuk kanë qenë jetëgjata dhe se kanë mbaruar në kohën e tyre. Sot, sipas Ramës, bashkëshortja që ka aktualisht, Linda, ia ka bërë më të largët atë kohë.
“Fillimisht…dua ta them sërish, jam me fat që jam burri i Lindës dhe kam Lindën në krah prej 10 vitesh, gjë që ma ka bërë shumë të largët kohën e mëparshme. Unë mendoj që në jetën e njerëzve, pjesa personale, private, është shumë individuale, e veçantë për secilin dhe është e vështirë që nga larg ta gjykosh. Nuk është e mundur. Unë nuk kam dashur asnjëherë të jem njeriu që jap mend. Në jetën private të gjithë janë të lirë të bëjnë atë që mendojnë. Moscenimi i lirisë është jeta e secilit. Për hir të së vërtetës kam patur thjesht raporte që në një moment të caktuar nuk kanë funksionuar dhe janë ndërprerë në mënyrë civile. Nuk ka pasur kurrë marrëdhënie të vështira me gratë,”- tha Rama.
Sa i përket raportit që ka pasur me të atin, kreu i qeverisë tregoi se ai kurrë nuk i imponoi të birit një mendim tjetër, ndryshe nga i tij. Arsyeja ishte respektimi i lirisë së mendimit.
Ai e cilësoi të atij “një dhuratë nga Zoti”, duke shtuar se nuk mban mend që të ketë ngritur dorën ndaj tij e aq më pak t’i mbyllte gojën, pra t’i hiqte të drejtën e fjalës.
Ai tregoi se ka qenë një fëmijë shumë rebel dhe prej kësaj mes tyre kanë lindur shumë debate.
Më ka dhënë mundësinë që unë të jem unë. Ai asnjëherë nuk e ka përthyer personalitetin tim, sipas frikës apo shqetësimit, apo mendjes së tij. Kjo ka qenë thelbësore. Pastaj në aspektin artistik kishim qëndrime të ndryshme, por im atë në atë pikë ishte shumë tolerant dhe nuk kërkonte të më bindte mua që çfarë unë pëlqeja, ndërkohë që isha ai që thoja se çfarë ai duhet të pëlqente. Në aspektin pastaj të marrëdhënies me regjimin, me sistemin, më kujtohet që vitet e fundit kanë qenë vite që nuk jetoja në shtëpi me prindërit dhe shkoja vetëm për drekën e së dielës, e cila gjithmonë përfundonte keq. Ai nuk bënte sherr, unë bëja sherr. Dhe më kujtohet kur ai u përzgjodh anëtar i Presidiumit të Kuvendit, unë kisha një obsesion dhe i thoja që ‘ke mundësinë ta takosh, e ke përballë Ramiz Alinë, pse nuk i thua që nuk vazhdohet më kështu’. Ai herë qeshte, herë e kalonte, herë thoshte se nuk është si mendon ti. Fiksimi im ishte që mos më dilte njëherë përballë Ramiz Alia dhe, në fakt, nuk më doli përpara se unë nuk u gjenda atë ditë.
Kryeministri Rama ka treguar se një nga ëndërrat e tij është që një ditë të mos i përgjgjet më telefonit të tij.
“Nuk e mendoj, e ëndërroj momentin kur telefoni im nuk do jetë i përmbytur dhe kur unë nuk do jem i detyruar ta ngre telefonin çdo herë,”- tha Rama ndër të tjera.
