Ndërkohë që pandemia Covid-19 i ka dhënë një goditje tepër të rëndë ekonomisë dhe shëndetit të shqiptarëve, për ta rënduar edhe më shumë situatën ka menduar Ministria e Shëndetësisë, e cila deri më tani nuk ka pasur një strategji të qartë efikase në luftën ndaj Covid-19. Deri më tani transparenca e qeverisë dhe ministrisë së Shëndetësisë ka qenë zero në raport me qytetarët, të cilët po e paguajnë deri edhe me jetët e tyre pasojat nga pandemia.
Ndër hapat më të rëndësishëm në luftën kundër pandemisë, është testimi i qytetarëve dhe gjurmimi i kontakteve, pikë kjo në të cilën Ministria e Shëndetësisë dhe ISHP kanë dështuar me sukses. Ndërkohë që pritej që Ministria e Shëndetësisë dhe ISHP të rrisnin numrin e testimeve, ndodhi e kundërta. Qeveria zgjodhi që këtë shërbim, i cili ofrohet falas, sikundër e parashikon ligji shqiptar, ta kalonte në struktura private. Rezulton se shërbimi i testit të Covid-19 në laboratorët privat, shkon sa “qimet e kokës” me çmimin e vendosur me ‘marrëveshje’ nga laboratorët, prej 4000 lekësh të reja.
Vendosja e njëkohshme nga këto laboratorë e çmimeve për kryerjen e testit serologjik, ngre dyshime për shkelje të kushteve të konkurrencës dhe marrëveshje të ndaluara në treg, siç janë të ashtuquajturat “Kartele”. Nga ana tjetër, Autoriteti i Konkurrencës ka bërë “një sy qorr dhe një vesh shurdh”, duke mos ndërmarrë prej kaq kohësh asnjë masë për të ndaluar rritjen e njëkohshme në grup të çmimeve të testeve serologjike, teksa as Ministria e Shëndetësisë nuk është kujtuar të rregullonte këtë problematikë gjatë kësaj kohë pandemie.
Mirëpo çfarë ndodh në botë?
Gjermania është një nga shtetet më të goditura nga pandemia në Evropë dhe po përballet me një nga karantinat më të rrepta. Por pavarësisht se situata është shumë e vështirë dhe vendi po kalon një krizë të madhe, Ministri i Shëndetësisë në Gjermani, Jens Spahn, ka bërë të ditur se vendi është gati të të shpërndajë falas tamponët për Covid-19 nga data 1 mars, duke përfshirë edhe testimet e shpejta, që japin përgjigje brenda 15 minutash. Sipas planit të qeverisë gjermane nga 1 marsi në qendrat e testimit dhe farmaci do të ofrohen teste te shpejta falas. “Ka mjaftueshëm teste të shpejta në treg”, ka thënë ministri i Shëndetësisë gjermane.
Kështu mund t’i hapet rruga për rikthimin disi në normalitet, pasi tamponi për 24 orë do të shërbejë si një “leje” për zhvillimin e aktiviteteve që aktualisht janë të ndaluara, si restorantet, mbrëmjet në lokalet e natës, kinematë, teatrot etj. Rrjedhimisht kjo gjë do të ndihmojë edhe në rimëkëmbjen e ekonomisë në Gjermani, që edhe pse është një nga shtetet më të fuqishëm në kontinent, po kalon një krizë të madhe për shkak të pandemisë.
Po vendet e tjera?
Edhe në shumë vende të tjera të Evropës po ofrohen teste falas për qytetarët. Nga muaji nëntor në Greqi Ekipet Shëndetësore Lëvizëse (KOMY) nisën të kryejnë teste falas të zbulimit të shpejtë të virusit.
Ndërsa në Paris qytetarët kanë mundësinë që të marrin teste të shpejta falas brenda disa çadrave të bardha, pa pasur nevojë fare për rezervim paraprak. Kjo iniciativë është bërë e mundur sepse tani janë të disponueshme teste më të shpejta për Covid-19.
Edhe Austria miratoi pak kohë më parë një rezolutë në Këshillin Kombëtar për të ofruar teste të koronavirusit falas në farmacitë në të gjithë vendin. Rezoluta u iniciua nga Partia Social Demokrate e Austrisë (SPÖ), duke fituar mbështetjen nga të gjitha partitë e tjera të mëdha përveç Partisë Austriake të Lirisë (FPÖ).
Aparatura e bërjes së tamponeve
Aparatura që mund të kryejë tamponin është prodhim zviceran dhe quhet ‘Cobas 6800’. Kjo lloj aparature kushton 320 mijë euro dhe kryen 384 teste në orë, që përkthehen në 9,240 teste në ditë.
Kjo do të thotë se një laborator në Shqipëri, me çmimin 95 euro të tamponit arkëton 877,800 euro në ditë që për 30 ditë përkthehet 26,334,000 euro. Kështu laboratorët e lidhur me njëri-tjetrin “kartelët” përfitojnë shifra marramendëse, kur kostot duken të papërfillshme.
Kjo do të thotë se qytetarët shqiptarë po paguajnë aktualisht më shumë se kushdo në rajon për kryerjen e analizave serologjike dhe të tamponit dhe këtë barrë ua ngarkoi vetë Ministria e Shëndetësisë.
