Një debat që degradoi në fyerje mes Robert Aliajt dhe Laert Vasilit; kështu ndodhi mbrëmjen e djeshme në emisionin “Opinion” në Tv Klan, ku po flitej për përfshirjen e artistëve në politikë. Por si nisi gjithçka dhe çfarë u tha më tej?
Vasili po tregonte se si bashkë me prindërit e tij kishte udhëtuar nga Athina për të ardhur në Tiranë, me qëllim kryerjen e detyrimit qytetar.
“Kemi hedhur votën dhe jemi kthyer”.
Fill pas kësaj deklarate, Blendi Fevziu iu drejtua Robert Aliajt:
“Ja Bert, ky është detyrim qytetar”.
Këtu nisi gjithçka…
“Estrada.. Kjo është estrada se tani është modernizuar, nuk i kanë më të shkretët humoristat estradë…”, tha ai.
Menjëherë erdhi replika:
“Jo zotëri, estradë është ajo që bën ti nëpër juri të ndryshme ku paguhesh me çeqe shumë të larta dhe tani u jep mend shqiptarëve”. (Kujtojmë se aktualisht, Robert Aliaj është pjesë e jurisë së “Love Story”).
Nuk vonoi përgjigjja e Aliajt:
“Unë s’paguhem për të qenë në radhë politike edhe për t’i lëpirë by***n miletit, por paguhem pikërisht për atë që them unë, të ndërgjegjësoj njerëzit, dhe kjo është forca ime”.
“Gjuhë prej rrugaçi”, ia ktheu Vasili.
Më tej, Robert Aliaj vazhdoi:
“Unë nuk jam përdorur ndonjëherë në politikë, unë kam qenë vazhdimisht në jetën time i angazhuar artistikisht duke bërë si artist art politik shumë të angazhuar. Unë nuk bëj dot foto kartolina në këmbim të një ryshfeti”.
Për të vijuar me Vasilin:
“Art politik do të thotë të bësh 2 vepra në gjuhën shqipe në mes të Athinës me aktorë shqiptarë. Njëra të luhet në 127 shfaqje, tjetra 317 herë në shqip me publik grek që vinte dhe ndiqte shfaqjen, dhe kur ti të kërcënohesh nga nazistët e Agimit të Artë, të vazhdosh të qëndrosh aty para dhe të thuash “po po, jam shqiptar dhe unë do mbroj të drejtat e bashkëatdhetarëve të mi që këtu vuajnë’. Ky është art politik”.
