Ditën e sotme në Kosovë mbahen zgjedhjet e katërta për krijimin e qeverisë së re. Ndërkohë kjo është hera e parë që KQZ-ja po merret me organizimin dhe monitorimin e zgjedhjeve në të gjithë territorin e Kosovës.
Mbi 1.7 milionë qytetarë votojnë në zgjedhjet parlamentare dhe liderët e vendit kanë bërë thirrje që të gjithë të ushtrojnë të drejtën e tyre dhe të vendosin për të ardhmen e vendit. Pavarësisht se po jetojmë në kushte të vështira pandemie, kjo situatë nuk i ka penguar aspak as qytetarët e prekur nga Covid-19 që të votojnë. Sot grupe të posaçme kanë shkuar në spitale dhe shtëpitë e të infektuarve për t’u mundësuar dhe atyre të drejtën e votës.
Grupet e posaçme kanë veshur veshje speciale për t’u mbrojtur nga virusi dhe kanë troktur derë më derë me kutitë e votimit për të mbledhur votat e të sëmurëve. Kjo shërben si një shembull se në një vend ku çdo gjë funksionon si duhet, mund të bëhet realitet gjithçka edhe në momentet më të vështira.
Ndërkohë ambasada amerikane në Kosovë, ju ka bërë thirrje qytetarëve që të votojnë për të treguar dashurinë për shtetin dhe familjen.
“Këtë ditë të Shën Valentinit tregoni dashurinë për shtetin dhe familjen tuaj. Votoni! E ardhmja e Kosovës është në duart tuaja”, thuhet në postimin e ambasadës.
Ndërkohë deri më tani procesi zgjedhor është zhvilluar i qetë dhe nuk ka pasur asnjë incident. Pavarësisht situatës aktuale dhe gjithë ngjarjeve politike që kanë ndodhur në Kosovë, nuk ka pasur asnjë lloj përplasje dhe kjo duhet të na bëjë të gjithëve krenarë, sepse në një vend demokratik dhuna dhe aktet vandale nuk janë kurrsei të pranueshme gjatë një procesi votimi. Edhe pse Kosova është një shtet realtivisht i ri ka shërbyer gjithmonë si një shembull për Shqipërinë se si bëhen punët e mira duke hedhur me kujdes çdo hap.
