Para disa ditësh e gjithë Shqipëria u përfshi nga një mot ekstrem, me shira të shumtë, që shkaktuan përmbytje në disa zona dhe të tjera u bllokuan nga bora. Po ashtu pati një ulje drastike të temperaturave, që filluan të rriteshin paksa vetëm gjatë ditës së sotme.
Por kjo nuk do të zgjasë shumë, sepse shirat pritet të nisin sërish nga e para. Madje në fundjave do të arrihet kulmi, ku do të ketë reshje të dendura shiu në një pjesë të madhe të territorit të vendit, ndërsa pritet dëborë në disa zona.
Gjatë ditës së djeshme autoritetet paralajmëruan se gjatë datave 23 deri në 26 janar vendi do të përballet me reshje të dendura, ndërsa zonat më të prekura pritet të jetë e gjithë Ultësira Perëndimore dhe pjesa jugore e vendit.
Sipas parashikimeve kulmi i reshjeve do të jetë gjatë kësaj fundjave, kryesisht në jugun e vendit. Parashikohet që në zonën e Mallakastrës dhe Tepelenës të bjerë mesatarisht 20 milimetra shi në orë.
Ndërkohë që zonat jugore dhe perëndimore do të përballen me reshje të dendura shiu, në fundjavë pjesa juglindore e vendit do të mbulohet nga dëbora. Korça pritet të këtë sërish reshje dëborë, të cilat do të jenë rreth 1 deri në 2 centimetër në orë.
