“Nuk kemi kohë për të humbur kur bëhet fjalë për të trajtuar krizat me të cilat përballemi. Kjo është arsyeja pse sot, unë jam duke shkuar në Zyrën Ovale për t’iu futur punës për të sjellë veprime të guximshme dhe lehtësim të menjëhershëm për familjet amerikane”, shkroi Joe Biden ditën e djeshme në Twitter menjëherë pas betimit.
There is no time to waste when it comes to tackling the crises we face. That's why today, I am heading to the Oval Office to get right to work delivering bold action and immediate relief for American families.
— President Biden (@POTUS) January 20, 2021
Kështu duket se ai e ka mbajtur fjalën dhe ka nisur menjëherë nga puna, duke nënshkruar 17 dekrete që përmbysin politikat e Trump. 9 nga dekretet e nënshkruara zhbëjnë politikat e paraardhësit të tij dhe pjesa më e madhe e tyre kanë si synim koronavirusin, ndryshimin e klimës, imigracionin dhe racizmin, përfshirë ndalimin e diskutueshëm të myslimanëve.
Së pari, Biden ka shfuqizuar ndalimin e udhëtarëve nga vende të ndryshme myslimane, që ishte dhe masa e parë që mori Trump në janar 2017 dhe që shkaktoi shumë protesta. Së dyti, Presidenti i 46-të i SHBA-ve ka vendosur kthimin në Marrëveshjen e Parisit për të luftuar “ndryshimin e klimës”. Së treti, Biden ka firmosur urdhërimin për mbajtjen e maskës me detyrim në të gjitha ndërtesat federale dhe në udhëtimet me tren apo aeroplan. Gjithashtu Biden nënshkroi edhe një dekret për rikthimin në Organizatën Botërore të Shëndetësisë (OBSH) në të cilën Trump ishte tërhequr pas pandemisë së COVID-19.
Po ashtu ai nënshkroi edhe një dekret për ndërprerjen e fondeve të siguruara për murin e ngritur në kufi me Meksikën i cili ka qenë një prej vendimeve më të debatueshme në periudhën e Trumpit. Muri Trump nuk do të përfundojë, por as nuk do të shkatërrohet. Nga ana tjetër, mbikëqyrja teknologjike në kufi do të forcohet. Në të njëjtën kohë, “një rrugë tetë-vjeçare drejt shtetësisë” do të vendoset për rreth 11 milion emigrantë të parregullt: pesë vjet për të marrë “green card”, lejen e qëndrimit të përhershëm dhe tre të tjerë që të kenë shtetësinë amerikane. Vetëm ata që hynë në territorin e SHBA para 1 janarit 2021 do të përfitojnë prej tij.
Biden nënshkroi edhe një dekret për anulimin e projektit të linjës së tubacioneve të naftës Keystone XL të cilën Obama pas 7 vite vlerësimesh e kishte refuzuar në nëntor 2015 për shkak të arsyeve mjedisore dhe të cilën Trump e kishte miratuar.
