Ditën e djeshme Fjolla Morina theu arrestin e shtëpisë, për t’u larguar në drejtim të paditur. Këtë gjë e vuri re vetë policia e Kukësit, që kishte marrë informacione se këngëtarja nuk ndodhej në banesën në të cilën duhej të kalojë arrestin e shtëpisë.
Shtëpia e këngëtares ka qenë e mbyllur dhe pasi është kërkuar për disa minuta që të hapet dera, askush nuk është përgjigjur. Ndërkohë ditën e sotme policia e Kukësit ka reaguar një ditë pas arratisjes së Fjollës dhe ka shpjeguar se pas këtij veprimi këngëtarja akuzohet për një tjetër vepër penale. Policia ka bërë me dije se ende po punohet për arritjen në gjurmët e këngëtares dhe kapjen e saj.
“Më datë 20.01.2021 u referuan materialet në Prokurorinë pranë Gjykatës së Shkallës së Parë Kukës, për veprën penale “Largimi i të burgosurit nga vendi i qëndrimit”, në ngarkim të shtetases F. M., 34 vjeçe, banuese në Prishtinë, e cila është me masë sigurie “Arrest në shtëpi”, të caktuar nga Gjykata e Shkallës Parë Kukës, pasi gjatë kontrollit të ushtruar nga Policia nuk është gjetur në banesë. Po punohet për kapjen e saj”, thuhet në njoftimin e policisë.
Këngëtarja Fjolla Morina dhe partneri i saj Fisnik Syla u arrestuan më 18 shtator në pikën kufitare të Morinës, pasi u kapën me dy armë me vete. Kujtojmë që këngëtarja po udhëtonte me një makinë tip ‘Audi’ ndërsa i është gjetur një armë në çantë dhe një në bagazh.
Ndërkohë para disa ditësh akuza për Fjolla Morinën ndryshoi nga “armëmbajtje pa leje” në “trafikim të armëve dhe municioneve”. Fjolla është marrë e pandehur nga prokuroria e Kukësit, për akuzën e “Trafikut të armëve dhe municioneve” kryer në bashkëpunim. Po ashtu edhe partneri i saj, Fisnik Syla, dhe shoferin e këtij të fundit, Fitim Muji, akuzohen për këtë vepër.
Fjolla ka pranuar akuzën e ngritur ndaj saj. Gjithashtu, ajo ka kërkuar të gjykohet me dënim të shkurtuar me qëllim që në përfundim të shqyrtimit gjyqësor, të përfitojë 1/3 e uljes së dënimit.
