Rektori i Universitetit të Mjekësisë, Arben Gjata, ka publikuar vendimin e ri në dhjetor për studentët e mjekësisë, i cili lidhet me shtyrjen e sezonit të provimeve të këtij semestri, për shkak të pandemisë së covid-19.
Ky vendim i Universitetit të Mjekësisë, vjen pas vendimit të protokolluar të vetëm tre ditëve më parë në lidhje me kohëzgjatjen e pushimeve zyrtare të fundvitit për studentët dhe administratën e këtij universiteti.
Sipas vendimit, për shkak të situatës nga covid-19, këshilli akademik ka vendosur që të bëhet një sezon i përbashkët gjatë verës, pra në muajin korrik, edhe për provimet e këtij semestri.
Duke patur parasysh volumin e jashtëzakonshëm të lëndëve në degët e mjekësisë, ky vendim nuk është pritur edhe aq mirë nga studentët e këtij univiersiteti. Shtyrja e provimeve të këtij semestri në një sezon të përbashkët me provimet e semestrit të dytë në korrik, bën që studentët të “torturohen” me një volum të jashtëzsakonshëm lëndësh që vështirë se mund t’i përballojnë.
Studentët e Fakultetit të Mjekësisë kanë dalë sot në protestë kundër “sezoneve të përbashkëta”. Ata gjithashtu kërkojnë një takim me rektorin e UMT, për të diskutuar për pakënaqësitë e tyre. Sipas studentëve, më 25 dhjetor është miratuar një vendim për të hequr sezonin e provimeve të muajit shkurt dhe prill, duke iu hequr studentëve mundësinë për të kaluar në lëndët e mbartura. “E kemi të pamundur të mbyllim provimet”-thonë ata.
Më tej, studentët deklaruan se në këtë mënyrë iu shtyhet me të paktën 1 vit diplomimi, duke iu vonuar edhe specializimin. “Na vonojnë shkollën me 1 vit, duke na vonuar edhe specializimin, qeveria dhe universiteti janë duke na vonuar diplomimin.”-tha njëri prej studentëve.
