18 janari cilësohet si “dita më depresionuese” e këtij viti apo si “e hëna blu”. Mendohet se kjo është një nga ditët kur njerëzit janë më të trishtuar dhe më pesimistë se çdo ditë tjetër të vitit. “E hëna blu” bie në të hënën e tretë pas Vitit të Ri.
Gjithçka filloi në 2005, kur akademiku Cliff Arnall përdori një ekuacion për të provuar se kjo ditë ka një ngarkesë të fortë psikologjike. Llogaria e zbrazët bankare pas pushimeve, moti i keq i janarit, koha e gjatë që na ndan nga festat e ardhshme, rëndojnë psikologjinë tonë dhe kështu doli e hëna blu.
Nga ana tjetër thuhet se e hëna blu lindi si pjesë e një fushate reklamimi nga agjencia e udhëtimit Sky Travel, për të cilën Arnall u punësua. Sipas tij, borxhet e marra për festa, kushtet e motit, paga mujore apo niveli i ulët i motivimit janë ndër arsyet që e bëjnë të hënën e tretë të vitit, ditën më të tmerrshme. Ndaj deri më tani “e hëna blu” nuk mbështetet mbi baza shkencore dhe shumë studiues nuk e mbështesin si ide. Megjithatë “e hëna blu” mbetet ende një trend në mediat sociale çdo vit. Gjithsesi nëse ndjeni këtë ditë se jeni të lodhur dhe nuk ndiheni mirë emocionalisht ka disa këshilla që mund t’ju ndihmojnë ta kapërceni: Vendosni në tryezë shumë perime, qëndroni aktivë, bëni shëtitje në natyrë, mos refuzoni marrëdhëniet seksuale dhe merrni sa më shumë vitaminë D.
