Pjesa më e madhe e vendeve në Evropë kanë siguruar vaksinat anti-Covid. Megjithatë situata nuk pritet të përmirësohet menjëherë me nisjen e fushatave të vaksinimit, pasi vetë OBSH-ja pranoi se vaksina nuk është shpëtimi i kësaj pandemie.
“Edhe kur vaksinat të fillojnë t’i mbrojnë më të cenueshmit, ne nuk do të arrijmë nivele të imunitetit të popullsisë ose imunitetit të tufave në vitin 2021. Edhe nëse kjo ndodh në disa vende, njerëzit sërish nuk do të jenë të mbrojtur nga Covid-19”, ka thënë shkencëtarja e OBSH-së, Soumya Sëaminathan.
Kështu një pjesë e mirë e vendeve të Evropës kanë vendosur të zgjasin më tej gjendjen e jashtëzakonshme.
Ditën e sotme në Itali është paralajmëruar se gjendja e jashtëzakonshme mund të zgjasë deri në fund të prillit. Gjithashtu vazhdon ende ndarja me zona, sipas shkallës së përhapjes së koronavirusit.
Gjermania ka paralajmëruar që për shkak të situatës, masat kufizuese ndaj Covid mund të zgjasin deri në shkurt. Ndërkohë kabineti gjerman ka miratuar kontrolle më të rrepta të hyrjes, duke u bërë thirrje qytetarëve që vijnë nga vendet me shumë raste ose ku po qarkullon mutacioni i virusit t’i nënshtrohen një testi koronavirusi.
Në Francë, Presidenti Emanuel Macron u takua me ministra të rangut të lartë për të diskutuar masat e reja të mundshme, ku pritet që ora policore të vendoset në orën 18:00 nga 20:00 që ishte deri më tani.
Holanda ka vendosur të zgjasë masat kufizuese të Covid, duke përfshirë mbylljen e shkollave dhe dyqaneve, me të paktën tre javë deri në 9 Shkurt.
Në Zvicër pritet që masat kufizuese të zgjasin deri në fund të shkurtit, duke qenë se aty ka mbërritu edhe mutacioni i ri i koronavirusit nga një turist britanik.
Në Danimarkë kryeministri Mete Frederiksen tha sot se vendi do të zgjasë masat e bllokimit dhe pritet që parlamenti të mbyllet me një muaj.
