100 artistë nga gjithë bota u bënë bashkë si kurrë më parë për edicionin e katërt të festivalit “Albanian Guitar Festival”. Kushtëzuar nga rregullat e pandemisë, festivali i kiatrës u mbajt online, mirëpo pati edhe fituesit e saj.
Konkursi ishte i ndarë në 5 kategori dhe fitues i çmimit të madh u zgjodh kitaristi i njohur italian, Nino D’Amico. Në kategorinë e katërt u zgjidh fitues Giovanni Masi, në kategorinë e tretë për fëmijë deri në 18 vjeç u shpall fitues Veljko Brankovan, në kategorinë e dytë Ausias Parejo dhe në kategorinë e parë për fëmijë deri në 13 vjeç fitoi Samuel Solomon.
Ndërsa vendi ynë u përfaqësua këtë vit në garë nga Xhoni Xhavari, që është nxënës në shkollën “Jordan Misja”. Drejtori artistik i Festivalit, Denis Bizhga, ka shprehur dëshirën që vitin e ardhshëm të realizohet edicioni i pestë i “Albanian Guitar Festival” në kushte normale dhe me publikun pranë.
“Një artist e ndjen shumë mungesën e skenës dhe të publikut, se publiku është faktori shtesë që e merr në mënyrë të drejtpërdrejtë emocionin. Shpresojmë që vitin e ardhëm të kemi një edicion tjetër, por që kësaj here të jetë live”, është shprehur Bizhga.
