Në mars numëroi 35 mijë të moshuar të vetmuar në qytetin e Tiranës, sot do të japë drekë vetëm për 44 pleq të vetmuar. Kryebashkiaku i Tiranës i ka qejf fotot dhe videot duke shpërndarë ushqim për të varfrit. Janë pa shpenzime dhe kanë efekt tek njerëzit. Se sa kushton një foto që do ta bëjë për Vitin e Ri, zbulohet nga tenderi mbyllur nga Bashkia Tiranë më 14 dhjetor 2020. Janë më shumë se 23 milionë lekë, për t’u dhënë drekë vetëm 44 të moshuarve. Të tjerët, le të ngopen duke parë Veliajn në televizor.
Numri e të moshuare të vetmuar na e ka dhënë vetë Erion Veliaj më 29 mars 2020. Në një aksion për të ndihmuar me ushqime të moshuarit me moton “Adopto një të moshuar”, kryebashkiaku u shpreh:
“Në Tiranë kemi 35000 të moshuar që jetojnë vetëm. Ne do fokusohemi te ata që janë realisht vetëm. 0800 0888 është numri i telefonit për të gjithë pensionistët që janë vetëm. Nëse kanë aplikacione të kërkojnë ndihmë tek Shqipëria.al” . Sigurisht, që ky numër të moshuarish është harruar bashkë me numrin e telefonit. Por, qenkan pakësuar të moshuarit e vetmuar, kanë mbetur vetëm 44.
Programi i Bashkisë
Bashkia e Tiranës do të ushqejë 44 të moshuar të vetmuar me më pak se 380 lekë (të reja në ditë) për 4 muaj.
Tenderi me fond 23.31 milionë lekë u zhvillua në Agjencinë e Prokurimit Publik. Tenderi konsiston në ofrimin e Asistencës shtëpiake për të moshuarit e vetmuar. Sipas detajeve të dokumentacionit, bëhet fjalë për një projekt social 4 mujor, ku asistentët në familje do të kujdesen për drekën e 44 të moshuarve.
Megjithatë, bëhet fjalë për më shumë se vetëm kujdesin në të ngrënë. Sipas tenderit, detyrat e asistentëve socialë vijojnë si më poshtë:
Mbështetje për kujdes shëndetësor;
Ofrimi i vaktit ushqimor;
Përkujdesje psiko-sociale;
Mbështetje për përkujdes për plotësimin e nevojave bazike higjeno-sanitare;
Pjesëmarrje të përfituesve në aktivitete social-kulturore për të siguruar socializim;
Mbështetje për përfitimin e terapisë okupacionale pranë qendrave ditore bashkiake.
Ku u gjetën paratë?
Fondi është vënë në dispozicion nga të ardhurat e Buxhetit të Shtetit nga Shërbimin Social Shtetëror transferuar në Bashkinë e Tiranës me shkresën Nr.15019 prot dt.11.05.2020 për ”Akordimin e fondeve për financim në ofrimin e shërbimeve të përkujdesit shoqëror për vitin 2020”.
Në çmimin e tenderit përfshihet një vakt (dreka) për 44 të moshuar të vetmuar në Tiranë, për një periudhë 4 mujore, në total 104 ditë.
Gjithashtu, në këtë çmim përfshihet pagesa 4-mujore për një staf i përbërë nga 1 koordinator dhe 4 punonjës të tjerë, pra, në total 5 persona.
Tender pa garë
Tenderi është zhvilluar pa garë, sepse në të ka poasur vetëm një pjesëmarrës, Qendra për Administrim Social Ekonomik territorial”. Kjo qendër është frekuentuese e rregullt e fondeve të Bashkisë Tiranë. Arsyeja kryesore që nuk ka pasur konkurrencë është vlera e vogël e fondit, pra vetëm për 44 të moshuar. Është një aksion simbolik i Bashkisë me para të marra nga Shërbimi Social, që e ka si objekt punë këtë përkujdesje. Pra, kaq pak para mjaftojnë vetëm për fotot e kryetarit Veliaj.
Afati kohor për hapjen e ofertave ose kërkesave për pjesëmarrje ishte 27 nëntor 2020, ora 12:00, ndërsa fituesi u shpall më 14 dhjetor 2020.
