Pushimet dimërore këtë vit do të zgjasin më gjatë për shkak të zhvillimeve në lidhje me pandeminë. Ministrja e Arsimit, Evis Kushi, ka deklaruar ditën e sotme se shkolla nuk do të rifillojë në 4 janar pas pushimeve, siç ishte planifikuar, por 1-2 javë më vonë. E ftuar në studion e “Abc-së”, ajo u shpreh se nuk është vendosur ende data, por është e sigurt se fëmijët nuk do të kthehen në banka në 4 janar.
“I vetmi sinjal që kemi është që pushimet dimërore do të jenë më të gjata. Akoma nuk e kemi vendosur nëse do të jetë 11 apo 18 janar fillimi i shkollës. Theksoj se dinamika e pandemisë do të ndikojë në vendimmarrje”, tha Kushi.
Ministrja theksoi se efikasiteti i mësimit online nuk është i njëjtë me mësimin fizik, por për të parandaluar përhapjen e Covid-19 është vendosur që procesi mësimor të jetë online dhe i alternuar.
Pavarësisht se të gjithë e dinin se mësimi fizik nuk do të ishte 100% i mundur për shkak të zhvillimeve të pandemisë, Ministria e Arsimit nuk bëri asnjë lëvizje gjatë kësaj kohe, duke i lënë mijëra nxënës e studentë në udhëkryq. Vendimi për nisjen e mësimit online në universitete u mor në moment të fundit dhe në shkollat 9-vjeçare e gjimnaze nuk u mor ansjë masë për të ruajtur shëndetin e nxënësve e mësuesve.
Nga ana tjetër nuk dihet nëse pushimet më të zgjatura në kohë do të jenë vërtetë efikase, por pritet të shohim nëse kjo periudhë do t’i shërbejë ministrisë për të marrë masa të tjera për muajt në vazhdim. Ndërkohë Komiteti Teknik i Ekspertëve ka konfirmuar më herët për “Abc News” se po shqyrtohet edhe mundësia e afrimit të orës policore, duke e izoluar vendin nga ora 20:00-06:00.
