Vrasja e 25-vjeçarit Klodian Rasha nga efektivi i policisë ka shkaktuar reagime të shumta nga qytetarët. Mbrëmjen e djeshme mijëra u ngritën në protestë e duke kërkuar shkarkimin e ministrit të Brendshëm, Sandër Lleshaj, pas ngjarjes tragjike. Reagime pati edhe nga personazhe të njohur, që mbështetën protestën duke dalë në shesh apo përmes postimeve në rrjete sociale.
Ndërkohë artisti i Operas, baritoni Ylber Gjini, ka zgjedhur të “protestojë” ndryshe për vrasjen e Klodian Rashës. Gjini ka ndarë në rrjete sociale një video, në të cilën shfaqet duke vajtur për të ndjerin.
“Shumë shkruajtën për Klodian Rashën. Unë zgjodha një formë tjetër, VAJTIMIN! Pushofsh në paqe”, ka shkruar artisti.
Klodian Rasha u vra në mesnatë duke gdhirë 8 nëntor nga një efektiv i njësisë “Shqiponja”. Ndërkohë ditën e sotme priten sërish protesta para Ministrisë së Brendshme.
