Një prift 20-vjeçar, Nikolla Xhufka, ka zbuluar një kishë të veçantë, e cila ndodhet nën dhe, poshtë shtëpisë së tij. Kisha katakomb është unike në vendin tonë dhe mbart vlera të rralla historike, fetare e kulturore.
Kjo kishë ndodhet brenda lagjes Kala në Elbasan nën themelet e banesës ku është rritur vetë prifti. Kisha, që mban emrin e Shën Kozmait, ka funksionuar ndër shekuj për besimtarët edhe në kohë luftërash, pushtimesh e diktaturash.
Prifti 20-jeçar ka zbuluar se kjo kishë është e ndërtuar sipër murit të kalasë së Elbasanit, gjë që i shton akoma më shumë vlerat.
“Vlerat historike që kjo kishë ka, e para është lipsani i Shën Jovan Vladimirit që është një vlerë shpirtërore e jashtëzakonshme. Një vlerë tjetër e shtuar është që kjo kishë është ndërtuar sipër murit të kalasë gjë që nuk besoj se e ka hasur ndokush”, shprehet prifti Nikoll Xhufka.
Në këtë kishë nuk ka ndryshuar asgjë gjatë viteve dhe ajo ka mbetur po e njëjtë që nga fillesat e saj. Prifti ka shprehur edhe dëshirën për ta kthyer kishën e Shën Kozmait në një atraksion turistik, duke qenë se është vërtetë unike.
