Ekspertët e bankingut e vlerësojnë këtë kohë si një moment të volitshëm, sidomos për ata që duan të blejnë një pronë të patundshme. Për të gjithë individët që duan të marrin një kredi, normat e interesit janë ulur ndjeshëm.
Sipas statistikave të fundit të Bankës së Shqipërisë, në muajin tetor të këtij viti, norma e interesit për individë për hua për shtëpi në lekë ishte 3.41%, duke u luhatur në nivelet minimale rekord.
Edhe në euro, kreditë për shtëpi janë më të ulëtat se asnjëherë. Sipas statistikave të BSH-së, nëse merr një hua hipotekore në euro, interesi vjetor është 2.76%.
Por ndryshe nga kredia për shtëpi, që aktualisht është më e lirë për shkak të uljes së normave të interesit nga bankat private, overdtafti, apo paratë që të punësuarit tërheqin në bankë kur u mbaron paga, është një produkt i cili është shtrenjtuar.
Në tetor, overdrafti arriti në 11.6% në lekë në tetor, nga 10.5% që ishte muajin e mëparshëm.
Tendenca ka qenë e kundërt për overdraft në euro, që ka një normë vjetore prej 6.5%, nga 7.3% në shtator.
Shtohet interesi për pasuri të patundshme
Individët kanë shtuar interesin së fundi për të blerë pasuri të paluajtshme, duke iu drejtuar bankave për kredi, duke shënuar një gjallërim pas tkurrjes së kërkesës në periudhën e karantinës.
Të dhënat e tjera të BSH-së bënë të ditur se në gusht, kredia e re për individët ishte në nivele të përafërta me një vit më parë, në vlerën e 5.1 miliardë lekëve.
Edhe tek individët vërehet një tendencë e ngjashme, me rritje të kredisë për blerjen e banesave, ndërsa kredia konsumatore rezultoi sërish në rënie edhe për muajin gusht.
Kredia e individëve për blerje banesash preku vlerën e 2.7 miliardë lekëve ose rreth 22 milionë eurove.
Të dhënat e Bankës së Shqipërisë treguan të hënën se indeksi i çmimit të pasurive të paluajtshme u rrit me 4.9% në 6-mujorin e parë të këtij viti.
Bankat lehtësojnë kushtet për kredi
Bankat kanë lehtësuar kushtet e kredisë për individët, ndryshe nga ato të bizneseve. Sipas Bankës së Shqipërisë, Standardet e kreditimit për individët u lehtësuan në 3-mujorin e tretë të vitit 2020.
Lehtësimi i standardeve u aplikua si për kreditë konsumatore, ashtu edhe për ato në blerjen e banesave. Në 3-mujorin e fundit të vitit, bankat presin t’i lehtësojnë më tej standardet e kreditimit për individët, kryesisht në kreditë konsumatore.
Po ashtu, bankat treguan një tolerancë disi më të lartë ndaj rrezikut për kreditë dhënë individëve këtë 3-mujor. Faktorët e tjerë u raportuan të pandryshuar nga një tremujor më parë.
Sa milionë kredi marrin shqiptarët në muaj
Familjet shqiptare po marrin mesatarisht mbi 20 milionë euro kredi çdo muaj për të blerë banesa.
Në intervalin mes muajve korrik dhe tetor, kredia e re për blerje banesash nga individët kishte vlerën mesatare mujore të 2.55 miliardë lekëve, ose rreth 20.6 milionë euro.
Vlera mesatare mujore e kredisë së re për individët është madje 9% më e lartë, krahasuar me të njëjtën periudhë të vitit të kaluar.
Në fund të muajit tetor, portofoli i kredisë për blerjen e banesave nga individët kapte vlerën e 125.4 miliardë lekëve ose 1.01 miliardë eurove. Krahasuar me një vit më parë, kredia për blerjen e banesave është zgjeruar me pothuajse 8%.
Në tregut të banesave, sipas Bankës së Shqipërisë, në 6-mujorin e parë të vitit, çmimet vazhduan të rriten, me 4.9% më shumë, krahasuar me 6-mujorin paraardhës.
Për Tiranën, rritja e çmimeve ishte edhe më e lartë, me 6.5%, ku regjistruan rritje në zonat qendrore dhe periferike të kryeqytetit.
/Burimi: BSH/Përshtati: Iconstyle.al/
