Prej disa kohësh Bashkia e Tiranës ka nisur intensivisht ofensivën mbi bizneset në kryeqytet duke u pamundësuar punën dhe rrjedhimisht duke i çuar drejt falimentimit.
Justifikimi ka qenë padyshim i gjetur: Ndërtimi i korsive të biçikletave në disa prej rrugëve kryesore të vendit, ku janë vendosur më së shumti dyqanet e Tiranës.
Pronarët e dyqaneve janë shprehur gjithnjë të revoltuar nga këto vendime të Bashkisë, duke theksuar se synimi i saj i vërtetë nuk lidhet me ndërtimin e korsive, por interesat e fshehura për tu ardhur në ndihmë olirgarkëve.
Si ndodh kjo?Bllokimi i rrugëve përpara këtyre bizneseve çon në falimentimin e tyre dhe kjo në “drejtimin me pahir” të qytetarëve drejt qendrave tregtare.
Disa ditë më parë biznesmeni dhe publicisti Rezart Lahi, i cili drejton kompaninë e mjeteve të kancelarisë “Infiniti”, në një intervistë për “Gazeta Reforma” e vendosi gishtin tek qëllimi, duke thënë se aksionet me gjoba në rrugën “Mylym Shyri” synojnë zhvendosjen e klientelës drejt qendrave tregtare. (KLIKO) Lahi deklaroi se, nuk mund të lihet krejt pa parkim një rrugë tregtare.
Si u falimentuan bizneset në “Myslym Shyr”?
Risjellim në vëmendje se Bashkia Tiranë lajmëroi në fund të muajit prill se ka përfshirë rrugën “Myslym Shyri” në projektin e saj për korsi biçikletash, i cili parashikon ngushtimin e rrugës së makinave dhe ndalimin e parkimit. Pas këtij vendimi shumë biznese në këtë rrugë kanë shpallur falimentimin.
Sipërmarrësit u ankuan se nuk u përfshinë në vendimmarrje dhe se nëse ndalohet parkimi dhe ngushtohet rruga të ardhurat e tyre nga aktiviteti mund të përgjysmohen. Shumë biznese që u hapën pas pandemisë në rrugën Myslym Shyri e patën të vështirë të siguronin parkim për punonjësit, furnitorët, apo dhe klientët, sepse zona nuk ka hapësira të tjera për parkim.
Ky problem nuk është vetëm i bizneseve, por edhe i banorëve të kësaj lagjeje, pasi kjo zonë është kryesisht me pallate të vjetra, të cilat nuk ofrojnë mundësi parkimi, ndërkohë që hapësira te ish-“Ekspozita Shqipëria Sot”, e cila shfrytëzohej për parkim me pagesë, i ka kaluar privatit për ndërtimin e një ndërtese.
Por përveç rrugës Myslym Shyri, një problematikë të ngjashme kanë hasur bizneset dhe banorët e rrugës Hoxha Tahsin, Qemal Stafa dhe Rruga e Durrësit. Në këtë të fundit bashkia ka krijuar edhe një super kaos në trafik, duke bllokuar të gjithë Tiranën.
Punimet në rrugën e Durrësit futin në kaos Tiranën dhe bizneset!
Ndalimi dhe kufizimi i lëvizjes së mjeteve është shoqëruar me problematika të theksuara të planifikimit dhe kontrollit kohor të zbatimit të investimeve publike dhe private, duke prekur ndjeshëm bizneset dhe mirëqenien e qytetarëve të Tiranës.
Gjendja paraqitet e vështirë prej muajsh, duke sjellë kosto shtesë krejtësisht të paarsyeshme për bizneset. Kostot shtesë paraqiten në lëvizjen e puntorëve, furnizimet me mallra dhe shërbime, shpenzimet e karburantit, humbjen e klientelës, etj. Mirëpo, Bashkia nuk ka vlerësuar pasojat ekonomike, financiare dhe mjedisore shoqëruese për bizneset dhe qytetarët dhe ka vepruar sipas politikës së “faktit të kryer”.
Dukshëm ndërhyrja e Bashkisë Tiranë, po sjell pasoja të rënda te bizneset, duke synuar që të gjithë blerësit e kryeqyteti të shkojnë në qendrat tregtare të oligarkëve që i ka pranë vetes.
