Gjithmonë e më shpesh po dëgjojmë të flitet për ndarje të skajshme të shtresave të popullsisë edhe në Shqipëri, midis të pasurve dhe të varfërve, ku këtyre të fundit u duhet të përballen me mbijetesën.
Kjo gjë po ndodh jo vetëm në nivelin e jetesës, konsumit dhe luksit, por edhe në marrjen e shërbimeve më të domosdoshme dhe më të drejta, siç është edhe arsimimi i fëmijëve.
Në këtë sektor vërehet një rritje e theksuar e pabarazitë ditë pas dite, teksa shtresat e popullsisë me të ardhura të larta po i rrisin shpenzimet për t’u arsimuar me ritme më të shpejta se ato të varfra.
Ekspertët e ekonomisë janë të mendimit se thellimi i pabarazive në arsim, shtron premisat për thellimin e hendekut pasuror edhe në të ardhmen.
Nga të dhënat e fundit të INSTAT-it, vërehet se në vitin 2019, familjet e pasura, që përfshihen në 20 përqindëshin me të ardhurat më të larta, i kushtuan arsimit gati 7% të shpenzimeve mujore, ndërsa familjet e varfra ato në 20 përqindëshin me të ardhura të ulëta shpenzuan për arsimin vetëm 0.2% të buxhetit mujor.
Nga të dhënat shihet se, shpenzimet e familjeve të “pasura” janë 34 herë më të larta se ato të familjeve të varfra.
Diferencimi
Më shumë se mungesa e fondeve, familjet në nivelin e ulët të të ardhurave nuk i kushtojnë vëmendjen e duhur arsimit, pasi mendohet se ato shpenzojmë më shumë nga buxheti i tyre për nevojat bazike si ushqyerja apo veshja, por pse jo edhe argëtimi.
Arsimi, i cili është mjeti kryesor për të ndryshuar perspektivën e varfërisë për këto familje, mbetet më i nënvlerësuar, sipas anketës së INSTAT-it për strukturën e shpenzimeve mujore në familjet shqiptare më 2019.
Të dhënat zyrtare tregojnë se, familjet e varfra shpenzojnë vetëm 0.2% të buxhetit të tyre mujor për arsimimin e fëmijëve, ndryshe nga shpenzimet për argëtim, restorante dhe hotele që marrin 3.2% të buxhetit mujor të tyre.
Shpenzimet për këto shërbime shihet të jenë 16 herë më të larta, se ato për arsim.
Të pasurit rrisin shpenzimet
Referuar të dhënave të fundit të INSTAT-it, familjet me të ardhura të larta i kanë rritur shpenzimet për arsim me ritme shumë më të larta, se familjet e varfra në dekadën e fundit.
Në vitin 2009, familjet me të ardhura të larta çonin 3.8% të shpenzimeve të tyre mujore për shërbimet arsimore, ndërsa në vitin 2019, ky tregues ishte gati dyfish, ose 6.9%.
Familjet më të varfra në vitin 2009, i dedikuan vetëm 0.1% të buxhetit të tyre mujor shërbimeve arsimore, ndërsa në vitin 2019 ky tregues ishte 0.2%
Në të gjithë botën, arritjet arsimore janë guri i themelit për të ndryshuar perspektiven ekonomike të një vendi.
Sipas studiuesve, barazitë në arsim sigurojnë një rritje gjithëpërfshirëse dhe të qëndrueshme të ekonomisë së një vendi.
/Burimi: INSTAT/ Përshtati: Iconstyle.al/
