Ditën e djeshme mbylli sytë përgjithmonë legjenda e përjetshme e futbollit, Diego Armando Maradona.
Lajmi trondës i cili u publikua fillimisht në mediat argjentinase, u përhap me shpejtësi në mbarë botën dhe humbja e tij na hidhëroi të gjithëve.
Para disa ditësh ai kishte kryer një operacion të ndërlikuar, pas një goditjeje të rëndë në tru dhe gjendja e tij ishte e stabilizuar, aq sa mjekët kishin dhënë lejen për të vazhduar kurën në një shtëpi pranë dy vajzave të tij.
Por jo gjithçka shkoi mirë sepse sipas raportimit të Clarin në Argjentinë, legjenda e futbollit botëror pësoi një arrest kardiak në shtëpinë e tij, në San Andres, në qytetin e Tigre.
Nipi i tij, Johnny Esposito, ka rrëfyer momentet e fundit të Maradona-s, i cili ishte kthyer në shtrat pasi kishte ngrënë mëngjes.
Sipas Esposito-s, fjalët e fundit të legjendës së futbollit ishin “Me siento mal” (Nuk ndihem mirë).
Ai ishte rikthyer në shtrat ku kishte pësuar një atak kardiak dhe pavarësisht se kishin thirrur ndihmën e shpejtë, kjo e fundit s’mundi të arrinte në kohë për të shpëtuar Maradona-n.
Sipas autopsisë, Maradona pësoi një vdekje nga shkaqe natyrale, rreth orës 12 të mesditës.
Maradona u lind në Lanus të Buenos Aires, në një familje të varfër si djali i vetëm pas katër motrave. U rrit profesionalisht në Argjentinë tek Argentina Juniors dhe më pas bëri kalimin tek Boca Juniors, aty ku tifozët e shihnin si ‘Zot’.
Më pas në vitin e largët 1982 Maradona kaloi tek Barcelona, Napoli, Sevilla dhe për t’u rikthyer më pas për ta mbyllur sërish tek ekipi i zemrës, Boca Juniors. Gjithashtu ai shkëlqeu në arenën ndërkombëtare me Argjentinën që e drejtoi edhe si trajner.
Së fundmi ai ishte trajner i Gimnasia de la Plata, ekipi i fundit me të cilin do të kishte të bënte. ”Djaloshi i artë” nuk do të jetë më mes futbolldashësve duke lënë një thesar të paçmuar në fushë dhe përtej saj. Shumë e konsiderojnë si futbollisti më i mirë i të gjitha kohërave, teksa vetë ai si pasardhës të tij e konsideronte Lionel Messi-n.
