“Ju keni konsumuar të gjitha GB e paketës suaj.”- është mesazhi më i padëshiruar i mundshëm që mbërrin në telefonat e qytetarëve shqiptarë nga kompanitë celulare. Ky refren përsëritet pas një kohe shumë të shkurtër që nga momenti kur ti aktivizon një paketë dhe ngelet enigmë se si Interneti konsumohet aq shpejt si me magji.
Për minutat nuk mund të themi të njëjtën gjë sepse ato i japin me pikatore e sigurisht që të gjithë mundohemi t’i përfundojmë sa më shpejt telefonatat. Duke qenë se në ditët e sotme komunikimi nëpërmjet telefonit e rrjeteve sociale është një nevojë bazike, askush nuk mund të rrijë pa paketat e famshme të ofertave që ofrojnë të treja kompanitë celulare në vendin tonë.
Përdor Vodafone, ALBtelecom apo ONE ? Ti mund të jesh abonent i njërës prej tyre xhanëm se nuk kemi shumë mundësi zgjedhjeje- por në fund faturat që paguajmë kanë të njëjtën vlerë për të gjithë. Kjo nuk na habit aspak pas oligopolit që të treja kompanitë vendosën në muajin shkurt.
Kompanitë celulare- oligopol ofertash
Së fundmi, Qendra Shqiptare për Gazetari Cilësore, ACQJ, ka bërë një vëzhgim mbi ofertat e tri kompanive celulare që operojnë në tregun shqiptar.
Në përfundim të tij është vënë re se në të tria kompanitë paketat standarde ditore kushtojnë 150 lekë, ndërsa paketat standarde javore kushtojnë 500 lekë. 4 paketat mujore standarde tek ALBtelecom kushtojnë 900, 1300, 1500 dhe 2100 lekë. 4 paketat standarde tek ONE kushtojnë 1000, 1400, 1600 dhe 2200 lekë. Paketat standarde te Vodafone kushtojnë 1000, 1400, 1700 dhe 2200 lekë.
Nga vëzhgimi rezulton se të tria kompanitë celulare operojnë në treg me thuajse të njëjtat çmime që ndryshojnë me 100 lekë.
Pra, ALBtelecom, Telekom (ONE) dhe Vodafone vijojnë me oligopolin e tyre në tregun e kompanive celulare, duke patur zero konkurrencë mes njëra-tjetrës.
Kjo lidhet me shkeljen e neneve 4 (Marrëveshjet e ndaluara të heshtura) dhe 9 (Abuzim me pozicionin dominues në treg) të ligjit nr. 9121, datë 28.07.2003 “Për Mbrojtjen e Konkurrencës”, i ndryshuar.
Kjo nxjerr në pah se tregu celular me pakicë ka probleme të konkurrencës, vihet re aplikimi i tarifave, të cilat ndikojnë negativisht në qëndrueshmërinë e konkurrencës midis operatorëve.
Oligopoli i shkurtit
Në shkurt të këtij viti qytetarë të shumtë shqiptarë kërkuan bojkotimin e kompanive celulare Vodafone, ALBtelekom dhe Telekom Albania, pasi këto të fundit rritën me 200 lekë çmimet e të gjitha paketave mujore duke u justifikuar se klientët kërkojnë më shumë njësi komunikimi, vendim që u pezullua përkohësisht nga Autoriteti i Konkurrencës.
Ky i fundit zhvilloi një mbledhje të bordit dhe mori vendimin për pezullimin e tarifës me 200 lekë të vendosura nga kompanitë celulare dhe po ashtu nisi një hetim për shkeljen e konkurrencës në treg.
Mirëpo, përveç kësaj, AK nuk mori asnjë vendim tjetër. Madje, sikundër “iconstyle.al” raportoi disa muaj më parë, në gusht, Autoriteti i Konkurrencës ka mbyllur në heshtje hetimin. AK është mjaftuar vetëm me disa rekomandime për kompanitë celulare, pa marrë ndaj tyre asnjë vendim ndëshkues për vjedhjen e kryer haptazi. (KLIKO)
Të ardhura të pakta, shpenzime të shumta për ofertat!
Populli shqiptar është renditur si një ndër popujt më të varfër (KLIKO) ndër vendet e të tjera të rajonit, por nëse bëjmë një krahasim të thjeshtë të parave që shpenzojmë në Shqipëri për ofertat e celularit, me një vend tjetër të rajonit ose më gjerë, duhet të themi se na paskan gënjyer! (KLIKO)
Sipas INSTAT, paga mesatare në Shqipëri është 400 euro, më e ulëta nga të gjitha vendet e rajonit. Më e larta është në Mal të Zi (765 euro), Serbi (644 euro), Maqedoni e Veriut (591 euro) dhe Kosova e parafundit (528 euro).
Këto shifra i përforcojnë edhe përllogaritjet e Fondit Monetar Ndërkombëtar që e renditin Shqipërinë si vendin me nivelin më të ulët të pagës mesatare mujore në rajonin e Ballkanit.
Por, nëse krahasojmë tarifat e ofertave me vendet e rajonit, rezulton se: qytetarët e Kosovës shpenzojnë mesatarisht 5 euro në muaj, qytetarët e Maqedonisë së Veriut 7 euro, të Malit të Zi 6 euro dhe qytetarët e Serbisë rreth 10 euro.
