Ekspertja e ISHP-së, Silva Bino dhe ministrja e Shëndetësisë, Ogerta Manastirliu mbajtën një konferencë ditën e sotme para mediave për të folur rreth situatës aktuale të pandemisë. Bino ju bëri thirrje të rinjve që të mbajnë maskat, sepse ata mund të bëhen shkas për vdekjen e dikujt tjetër.
Pavarësisht se është thënë se masat anti-Covid do të rishikohen herë pas herë, Bino tha se ato do të zbatohen deri sa vaksina të bëjë efekt dhe të ketë një impakt prej saj.
“Të gjitha masat për parandalimin e COVID-19 nuk janë një shkencë e madhe, janë ato që ne kemi në dorë për momentin. Edhe në momentin që do kemi vaksinën kjo vaksinë mund të ndihmojë ata që janë më vulnerabël për të mos bërë forma të rënda, por këto masa do zbatohen deri sa vaksina të ketë impakt mbi sëmundjen. Duhet të ndërgjegjësohemi. Impaktin e masave të fundit nuk mund ta shohim menjëherë. Sëmundja ka një periudhë inkubacioni që shkon deri në dy javë”, u shpreh Bino.
Para pak javësh u vendos që maska të mbahet me detyrim në ambientet e hapura e të mbyllura. Gjithashtu i gjithë vendi izolohet nga ora 22:00-06:00 dhe baret e restorantet qëndrojnë të mbyllur gjatë këtij orari. Ndërsa 2 ditë më parë Komiteti Teknik i Ekspertëve tre masa të reja shtesë për parandalimin e përhapjes së mëtejshme të Covid-19 në vend. U vendos që të ndalohen: grumbullimet me më shumë se 10 persona në vende të hapura dhe të mbyllura, mbledhjet partiake dhe tubimet, konferencat, ceremonitë e festave, ceremonitë martesore dhe organizimet përtej familjare të ceremonive mortore, deri në një urdhër të dytë.
