Javët e fundit ka pasur një shtim në masë të rasteve të reja me koronavirus, mirëpo vetëm një pjesë e vogël e popullësisë është infektuar. I ftuar mbrëmjen e sotme në emisionin “Kjo jave” në “News 24”, mjeku Arben Gjata, tha se as 10% e popullësisë shqiptare nuk e ka kaluar koronavirusin.
Ai shtoi se në rast se sistemi shëndetësor do të bjerë në kolaps, do të detyrohemi të futemi sërish në karantinë, si në muajin mars.
“Në Shqipëri nuk jemi as te 10% i popullatës, duke marrë përmasat e përhapjes së virusit. Problemi është që ne ta shtyjmë në kohë dhe të presim sa më pak raste. Problemi kryesor për mua është që të mos bjerë në kolaps sistemi shëndetësor, nëse sistemi paraqet zilen e kuqe të rënies në kolaps, do të detyrohemi për t’u futur sërish në karantinë”, tha mjeku.
Ndër të tjera ai tregoi se marrja e antibiotikëve në rast infektimi nuk ka efekt, ndërsa vitaminat e ndryshme ndihmojnë në forcimin e imunitetit.
“Mund të përdorim antibiotik kot. Antibiotikët nuk bëjnë efekt. Antibiotikët nuk nisin që në ditën e parë, por varet edhe nga situata e pacientit. Fatkeqësisht nuk ka formulë magjike, por është e nevojshme që të flitet me mjekun e familjes. Vitamina D, C, E, zinku mund t’i marrësh në fillim të sëmundjes, sepse të ndihmon për rritje të imunitetin e organizmit. Duhet të merren gjatë gjithë periudhës që jemi. Ne kemi trajtuar shumë mirë mjekët e familjes”, u shpreh Gjata.
