Polifonia labe konsiderohet si një nga vlerat më të rralla jo vetëm të kombit shqiptar, por edhe të gjithë botës. Nga viti 2005 iso-polifonia mbrohet nga UNESCO si trashëgimi gojore dhe shpirtërore dhe shumë etnologë e antropologë nga gjithë bota kanë bërë studime të shumta rreth kësaj vlere shqiptare. Polifonia është trasëhguar brez pas brezi që nga antiktieti dhe ende sot e kësaj dite ruhet me fanatizëm, por vëmendja e duhur nga institicionet shqiptare të kulturës duket se mungon.
Interesi i vakët ndaj iso-polifonisë
Guri Rrokaj është një nga të paktët këngëtarë të iso-polifonisë, që vazhdon ta mbajë të gjallë këtë kryevepër. Ai ka nisur të këndojë në një moshë fare të vogël dhe sot që është 66 vjeç vazhdon të kontribuojë në iso-polifoni së bashku me grupin e tij. Madje që nga viti 1995, 66-vjeçari është pjesë e grupit polifonik ndërkombëtar “Cann” të krijuar në Francë.
Mirëpo këngëtari ka një peng të madh për sa i përket iso-polifonisë dhe interesit që kanë treguar institucionet e kulturës. Në një intervistë për “Top Channel” ai është shprehur se institucionet tona, duhet të tregojnë më tepër vëmendje ndaj kësaj kryevpere për ta mbajtur gjallë si një vlerë të rrallë të popullit tonë.
0 mbështetje për trashëgiminë kulturore
Edhe më herët artistë të iso-polifonisë labe kanë ngritur shqetësimin për mungesën e interesit nga ana e Ministrisë së Kulturës apo për mos promovimin e duhur të kësaj vlere unike. Sipas tyre nuk kanë pasur mbështetjen për ruajtjen e trashëgimisë kulturore dhe se duhet shumë punë nga ana e institucioneve për ta mbajtur gjallë iso-polifoninë.
Yzeir Llanaj, mjeshtër i polifonisë, është shprehur para pak kohe në një intervistë për gazetën “Sot”, se mungesa e vatrave të kulturës është shoqëruar me këto shqetësime që ata kanë për artin e tyre. Ai ka treguar se janë vetë artistët ata që kanë kthyer shtëpitë e tyre në vatra kulture, sepse Ministria e Kulturës nuk është kujdesur fare për këtë pjesë.
https://www.youtube.com/watch?v=M5uJOtcdKG8
Sipas Llanaj ata që janë trashëgimtarë të kësaj vlere kanë formuar grupe dhe bëjnë prova në shtëpi, sepse nuk kanë mbështetje dhe se nuk është bërë asnjë punë për të sjellë diçka të re që mund t’i japë shpresë polifonisë.
“Folklori popullor po mbrohet nga bartësit e tij, jo nga Ministria e Kulturës. Ministria ka një administratë që merr paratë dhe jo se mundohet për këtë, sepse po të kishin dëshirë për ta mbrojtur këtë vlerë tradicionale dhe shpirtërore do të kishin vajtur grup më grup dhe fshat më fshat për ti ndërtuar ato vatra, por nuk ka interesim. Ministria e Kulturës nuk ka dhënë deri tani asnjë kockë për bartësit e polifonisë, që po e mbajnë vetë gjallë këtë trashëgimi shpirtërore. Mungon prezenca e të resë dhe nëse nuk do të ketë prezencë të së resë do të thotë që është e pashpresë, është skandal që ndodhet në venitje polifonia shqiptare”, ka thënë mjeshtri i polifonisë.
