Sipas raportit të ndikimit të pandemisë në mirëqenien e fëmijëve dhe familjeve në Shqipëri, 50% e prindërve raportojnë prezencë të dhunës verbale dhe 20% e tyre raportojnë prezencë të dhunës fizike në shtëpi, raporton World Vision për Shqipërinë.
“Çdo fëmijë duhet ta jetojë jetën në plotësinë e vet, i mbrojtur nga çdo lloj forme dhune dhe abuzimi. Jemi ne ata që si individë, por edhe si pjesë të institucioneve dhe organizatave që përfaqësojmë t’i bëjmë fëmijët të ndjehen të mbrojtur, të vlerësuar. Shifrat janë alarmante. 66% e prindërve apo kujdestarëve ligjorë e konsiderojnë dhunën si mjet disiplinimi. Pra si po ndikojmë ne në mirërritjen e fëmijëve?
Kjo është pyetja kryesore që sjellim përmes Labirintit, e cila na nxit të reflektojmë përpara se të veprojmë e të marrim vendime për fëmijët tanë.,”- nënvizon Eljona Boçe Elmazi, drejtoreshë e World Vision Albania.
Instalacioni‘Në Labirint’, është i vendosur në qendër të Tiranës, në sheshin Skënderbej. Përmes një eksperience individuale, secili do ketë mundësinë të reflektojë për rolin që ka si prind, familjar apo qytetar në procesin e rritjes së fëmijëve të tyre, si dhe ndikimin afatgjatë që kanë veprimet dhe vendimet e sotme në të ardhmen e fëmijës.
Gjetjet e monitorimit për mirëqenien e fëmijëve nga Ëorld Vision Albania tregojnë se rreth 60% e fëmijëve dhe adoleshentëve raportojnë se kanë përjetuar dhunë.
Ergisi, një prej të rinjve nga Kamëza shprehet: “Mesazhi im kryesor i drejtohet të gjitha institucioneve që duhet të kenë në fokus të veçantë mbrojtjen e njeriut e veçanërisht të fëmijëve, si dhe të garantojë zbatimin e ligjeve.
Çdo rast i dhunës së raportuar, qoftë dhunë fizike apo psikologjike, duhet të trajtohet deri në zgjidhje.
Bashkitë e vendit duhet të kenë qendra/ambiente me programe të posaçme që rrisin përgjegjshmërinë qytetare te fëmijët dhe të rinjtë si unë.”
