Pas shifrave alarmante të viktimave dhe rasteve të rej, kryeministri i Kosovës Avdullah Hoti tha ditën e djeshme se Kosova po shkon sërish drejt mbylljes totale, për shkak të përkeqësimit të situatës epidemiologjike.
Në një intervistë për Radion Evropa e Lirë, kreu i ekzekutivit tha se pritet që masat e reja të hyjnë në fuqi brenda dy ditësh.
Ditën e sotme, Hoti ka prezantuar masat e reja në një konferencë për shtyp, duke njoftuar se ato janë ndarë në tri grupe.
Kështu, mësimi në universitete do të zhvillohet online, ndërsa për pjesën tjetër qëndrojnë akoma masat e mëparshme, ndërkohë në komunat me rrezik të ulët, janë lejuar operatorët ekonomi të punojnë nga ora 05:00 deri në 20:00.
Grupi i dytë me rrezik të mesëm do të punojnë nga ora 05:00 deri në 18:00, gastronomia po ashtu deri në orën 18:00, kurse në grupin e tretë që përfshihen shtatë komuna, do të mbyllet çdo aktivitet duke filluar nga ora 19:00.
“Kemi përgatitur draft vendimin, që do të shkojë në Qeveri për votim. Kemi ndërmarrë masa që vlejnë në tërë territorin e Kosovës, duhet të kemi kontrolle në kufi, hyrje dhe dalje. Kemi vendos që Arsimi i lartë të kalojë plotësisht online, ndërsa parauniveristar vlen manuali që e kemi bërë më herët. Kemi vendosur që të kthehen ekipet kufitare që të bënë matjen e temperaturës në kufi. Të kthehen shtabet emergjente në komuna. Kemi rregulluar funksionimin për sektorin e ekonomisë në gjithë Kosovën. Lejohet sektori i bujqësisë, transporti, prodhimi. Këto janë masa për tërë territorin. Grupi i dytë i masave, është sipas kategorizimit të komunave sipas numrit të personave të infektuar. Komuna me rrezik të ulët, kemi lejuar operatorët ekonomi të punojnë nga ora 05:00 deri në 20:00, kemi rregulluar transportin publik. Kemi rregulluar edhe veprimtarinë e qendrave tregtare deri në ora 20:00, pastaj opsioni merr me vete. Grupi i dytë me rrezik të mesëm: punojnë nga ora 05:00 deri në 18:00, gastronomia po ashtu deri në orën 18:00. Është rregulluar po ashtu transporti. Qendrat tregtare punojnë deri në ora 18:00. Grupi i tretë, në zonë të kuqe janë shtatë komuna, Prishtina, Podujeva, Gjakova, Gjilani, Ferizaj, Fushë Kosova, Obiliqi dhe Shtimja. I kemi marrë dy veprime, e lejojmë aktivitetin ekonomik të zhvillohet deri në orën 19:00 me specifikat e manualit për mbrojtje nga koronavirusi. Nga ora 19:00 mbyllet çdo aktivitet ekonomik vendoset kufizim i plotë i qytetarëve, orë policore nga ora 19 në këto komuna. Ndalohen hyrje-daljet në këto komuna nga ora 19:00,”- ka deklaruar Hoti.
Që nga fillimi i pandemisë në Kosovë janë regjistruar 24.792 raste pozitive, ndërsa 768 persona kanë humbur jetën.
