Dy kompanitë më të mëdha të telekomunikacionit në vendin tonë “Vodafone” dhe “One Telecommunication” (ish-“Telekom Albania”) janë rikthyer tek fitimi për vitin 2019.
Për këtë të fundit duket se ndryshimi i pronësisë në fillim të 2019-s ka rezultuar pozitiv. Pasi pas dy vitesh me humbje të mëdha, që arritën në vitin 2018 në një rekord negativ(sipas asaj që deklaronte vetë kompania)prej 4.7 miliardë lekësh, operatori ka raportuar fitime prej rreth 270 milionë lekësh.
Sa i përket “Vodafone Albania”, operatori më i madh sipas të ardhurave, me qarkullim vjetor prej 15.9 miliardë lekësh në 2019-n, sipas të dhënave të vetë kompanisë, ka rezultuar për të dytin vit radhazi me fitime, që arritën në gati 1.9 miliardë lekë, me një normë prej 11.7% (nga 10.5% në 2018-n).
Duke u ndalur te ky i fundit, risjellim në vëmendje se Vodafone Albania ka bërë në korrik një lajmërim për një investim që thuhet se do të ndryshojë rrënjësisht cilësinë e shërbimeve fikse dhe TV për klientët shqiptarë.
Plot 500 milionë euro është shifra e majme që operatori celular ka njoftuar se do të investojë në infrastrukturën e rrjetit, pasi ka hyrë në tregun e telefonisë dhe internetit fiks, duke blerë aksionet e Abcom.
Mirëpo, pyetja e madhe që lind në këtë rast është se si do investojë Vodafone Albania një shumë kaq të madhe në infrastrukturën e rrjetit, kur deklaron një fitim të tillë?
Duke marë parasysh këto të ardhura, të deklaruara nga vetë kompania në fjalë, asaj do i duheshin mbi dy dekada, duke mos përfshirë asnjë shpenzim tjetër, në mënyrë që të bënte një investim të tillë.
Dy janë skemat që fshihen pas kësaj deklarate të bërë me krenari nga Vodafone në verë të këtij viti.
E para, Vodafone po mashtron sërish qytetarët shqiptarë, duke dhënë premtime që nuk i mban dot.
E dyta, Vodafone po mashtron qytetarët dhe shtetin shqiptar në deklarimin e të ardhurave duke deklaruar shumë më pak nga ç’fiton realisht.
Në të dyja rastet kemi të bëjmë me shkelje të ligjit dhe duhet hetim nga Autoriteti i Komunikimeve Elektronike dhe Postare (AKEP).
Kompanitë celulare me detyrime të prapambetura prej vitesh, ku i çojnë taksat?!
Autoriteti i Komunikimeve Elektronike dhe Postare pak ditë më parë, përmes një procedure prokurimi, ka kërkuar një konsulent për të bërë një rishikim dhe plotësim të kuadrit të tij ligjor duke synuar në plotësimin e disa boshllëqeve si dhe zgjidhjen e ngërçeve në disa hallka. (KLIKO)
Një nga qëllimet kryesore të ndryshimeve është mbledhja e detyrimeve të prapambetura që kanë krijuar operatorët ndër vite. Madje AKEP kërkon që mbledhja e detyrimeve të prapambetura t’i jepet si një e drejtë dhe titull ekzekutiv. Çka do të thotë që përmes këtij titulli AKEP do mund t’i vjelë këto detyrime edhe me forcë.
Në këto kushte AKEP kërkon që me përshtatjen në kuadrin ligjor të mbledhë në vijim detyrimet e prapambetura që i kanë operatorët ndër vite duke kërkuar që faturat që lëshohen nga AKEP të jenë titull ekzekutiv.
Nuk e dimë se ku i çojnë kompanitë celulare taksat që pretendojnë se paguajnë nëpërmjet nesh, po aq sa nuk dimë as përse tarifat e kompanive celulare në Shqipëri janë më shtrenjtë dhe me më pak oferta se tjetërkund në botë.
OK! Një gjë e dimë me siguri, kompanitë abuzojnë-klientët abuzohen. Normalisht, kompanitë gjejnë vend e bëjnë kuvend. Teksa kontrolli mbi to është i papërfillshëm e i paguximshëm, ato gjejnë madje edhe kurajon të gënjejnë me reklama boshe (KLIKO), me paketa që nuk japin as çerekun e asaj që ju marrin qytetarëve (KLIKO), e me një sërë shkeljesh të tjera që i kemi trajtuar e do i trajtojmë në vijim!
Jemi ankuar publikisht dhe i kemi bërë thirrje Autoritetit të Konkurrencës dhe AKEP, dhe do vijojmë tu bëjmë, ndonëse kemi bindjen se edhe ata nuk do e prishin fare terezinë. Thjesht do mjaftohen me ndonjë paralajmërim të zbehtë si ky i fundit.
