Gjatë ditëve të fundit arti dhe kultura shqiptare kanë pësuar goditje të njëpasnjëshme, pasi janë ndarë nga jeta disa figura të njohura të cilët kishin dhënë kontribute të çmueshme në këtë fushë.
Pas humbjes së aktorit, regjisorit dhe artistit shumëplanësh, Koço Devoles, një tjetër lajm i hidhur vjen pasi mësohet se dhe dirigjenti i njohur Milto Vako, ka ndërruar jetë në moshën 90-vjeçare.
Bëhet me dije se profesor Vako, ka ndërruar jetë mbrëmjen e djeshme. Gjendja shëndetësore e tij sipas të afërmve, prej disa kohësh ishte e dobët.
Kujtojmë se profesori dhe dirigjenti Milto Vako, përpos kontributit të vyer të tij në muzikë dhe në katedër, ishte edhe anëtar nderi Forumit Ballkanik Koral.
Biografi e akademikut dhe dirigjentit Milto Vako:
Milto Vako u lind në Pogradec në 30 mars 1930. Kreu shkollën e mesme artistike “Jordan Misja” në vitin 1952. Në vitet 1953–1959 vijoi studimet e larta në Konservatorin “Çajkovski” në Moskë, ku diplomohet si dirigjent kori, me profesorin e famshëm Sokollov.
Pas studimeve u emërua dirigjent në Ansamblin Shtetëror të Këngëve dhe Valleve Popullore, njëkohësisht pedagog në Institutin e Lartë të Arteve dhe në Liceun Artistik.
Në 1964-1968 punoi si dirigjent në Teatrin e Operas dhe Baletit. Në 1968-1973 është udhëheqës artistik i Ansamblit të Këngëve dhe Valleve Popullore. Në 1973 dënohet, largohet nga Ansambli i Këngëve dhe Valleve Popullore dhe internohet në Tepelenë, ku punoi për dy vjet rresht në kushte të vështira.
Në 1975 arrestohet nga regjimi komunist dhe dënohet për agjitacion e propagandë. Vuan dënimin në burgun e Tepelenës e në Ballsh deri në vitin 1982.
Pas burgut, deri në vitin 1991 punon si punëtor në ndërmarrjen e Mirëmbajtjes së Shkollave të Tiranës. Në vitet 1991–1993 kthehet pedagog në Akademinë e Arteve. Ndërsa në vitet 1993-2001 ishte shef i katedrës së kantos e dirigjimit.
Nga 2001 e deri më sot është pedagog i katedrës së kantos dhe dirigjimit. Ka themeluar dhe drejtuar koret e vajzave në Akademinë e Arteve si dhe korin e Kishës Ortodokse Autoqefale të Shqipërisë. Ka dhënë me dhjetëra koncerte si brenda e jashtë vendit, ku është nderuar me çmime të ndryshme. Është autor i shumë teksteve dhe mban titullin profesor, si dhe “Artist i merituar”./Iconstyle.al/
