Joe Biden ka të ngjarë të takojë Mbretëreshën Elizabeth pasi të marrë zyrtarisht titullin në janar. Mbretëresha është takuar me çdo President të SHBA, përveç Lyndon B Johnson, andaj gjasat që të takojë edhe Biden janë të mëdha.
Megjithatë, është një anëtar i familjes mbretërore që Biden tashmë e ka takuar. Bëhet fjalë pikërisht për Princ Harry – madje duket se dyshja ka krijuar një miqësi të bukur ndër vite.
Zonja e parë e SHBA, Jill Biden u takua për herë të parë me Harry gjatë turit të tij në 2013, gjatë së cilës ai mori pjesë në një ceremoni për luftëtarët britanikë dhe amerikanë në Washington. Në atë kohë, Joe dhe Jill Biden ishin Zëvendës President dhe zonja e dytë nën administratën e Presidentit Obama.
Jill Biden më vonë udhëtoi në Londër për të mbështetur ekipin amerikan në “Invictus Games Foundation” në 2014, të mbajtur nga 10-14 shtator në Parkun Olimpik të Mbretëreshës Elizabeth, ku u mblodhën mbi 400 konkurrentë nga 13 kombe të botës.
Çiftet Biden dhe Obama vazhduan të mbështesnin ngjarjen, në të cilin ndodhej edhe Harry, i dërguar nga gjyshja e tij. Në këtë eveniment ata janë takuar disa herë, ku edhe janë fotografuar nën shoqërinë e njëri-tjetrit.
Duka dhe Dukesha e Sussex, të cilët u larguan nga detyrat mbretërore në mars, kanë folur hapur për rëndësinë e votimit në prag të zgjedhjeve në SHBA.
Harry tha se si anëtar i familjes mbretërore britanike, nuk ishte në gjendje të votojë në zgjedhjet presidenciale të këtij viti, por Meghan pranoi se kishte marrë pjesë në votim.
Pavarësisht miqësisë së Harry me Biden, as ai dhe as Meghan nuk kanë shprehur qartë pikëpamjet e tyre personale politike dhe nuk kanë mbështetur ndonjë parti në prag të zgjedhjeve të SHBA në 2020.
Ndërkohë princ Harry dhe Meghan Markle bënë një vizitë në Varrezat Kombëtare të Los Angelestë dielën, për nder të Ditës së Përkujtimit në Mbretërinë e Bashkuar. Ndërsa pjesa tjetër e Familjes Mbretërore e mbajti këtë në ceremoninë në Londër, Duka dhe Dukesha e Sussex vizituan varrezat e Los Angeles për të nderuar heronjtë e luftës në ngjarjen vjetore.
