Ministria e Arsimit i ka nisur një kërkesë Ministrisë së Shëndetësisë që studentët e vitit të par të jenë në auditore javën e parë të vitit akademik pë t’u njohur me sistemin e mësimdhënies dhe më pas të kthehen sërish online.
“Ministria e Arsimit, Sportit dhe Rinise, vlerëson punën përgatitore dhe të gjitha masat e marra deri më tani nga IAL-te në respektim të akteve rregullatore, lidhur me masat dhe protokollet higjienosanitare mbi parandalimin e përhapjes së infeksionit COVID-I9. Por ju bëjmë me dije se, në vijim te propozimit të datës 29.10.2020 të Komitetit Teknik të Eksperteve, për zhvillimin e procesit mësimor vetën në distance dhe pa prezence fizike për një muaj nga institucionet e arsimit të larte, MASR me shkrese ill. 5838 prot., datë 30.10.2020 i kërkoi Ministrisë Shëndetësise dhe Mbrojtjes Sociale që për studentet që fillojnë për herë të parë një program studimi, të lejohet prezenca e tyre ne IAL, në grupe të vogla sipas një grafiku të përcaktuar, vetëm për javën e parë të vitit akademik 2020-2021, në përputhje me rregullat e distancimit fizik, si dhe masat e protokollet e miratuara nga Instituti i Shëndetit Publik dhe MSHMS-ja, me qellim që këta studentë të njihen me rregullat e funksionimit të procesit mësimdhënes pranë IAL-ve ku do të ndjekin programin e studimit dhe të njihen me procedurat e zhvillimit të procesit mësimdhënës në distancë”, thuhet në letrën e Ministrisë së Arsimit sipas “AbcNews.al”.
Ndërkohë Ministria e Shëndetësisë në përgjigjen e saj shprehet se kjo gjë është totalisht e pamundur, sepse konsiderohet i rrezikshëm rikthimi në auditor i studentëve të vitit të parë.
Vendimi i vonuar për mësimin online, lë studentët në udhëkryq!
Ministria e Shëndetësisë vendosi vetëm 3 ditë para nisjes së vitit akademik që mësimi të zhvillohet online. Kjo gjë është shoqëuar me pikëpyetje të mëdha dhe pasoja të shumta, sidomos tek studentët që vijnë nga rrethe të tjera në kryeqytet për të studiuar. Pothuajse të gjithë kanë bërë pagesa në konvikte qoftë për disa muaj ose 1 vit të plotë, ndërsa të tjerë kanë paguar qiratë e shtëpive. Sikur mos të mjaftonte ky fakt, Komiteti i Ekspertëve propozon që vetëm një muaj të jetë online, ndërsa vendimi për vijimin e tij të merret në varësi të situatës që do paraqitet në nëntor. Kjo i ka lënë studentët në udhëkryq, nëse duhet të qëndrojnë në Tiranë, nëse do u kthehen auditorëve në muajin dhjetor apo të kthehen në shtëpitë e tyre. Në të dyja rastet ka sërish shpenzime ekstra dhe të panevojshme.
Ndërkohë jo më kot studentët e vitit të parë ndihen të shqetësuar, sepse duke parë eksperiencën e mëparshme me mësimin online nuk dinë se si do të shkojë me ta që nuk dinë fare se si funksionon sistemi në një universitet. Duke qenë se semestri i dytë i vitit akademik 2019-2020 u zhvillua online, atëherë Universitetet duhet të ishin më të përgatitura dhe teksa qeveria humbi kohë kot mund të ishte punuar në përmirësimin e tij. Mirëpo asgjë nuk u bë dhe nëse të gjithë do të ishin angazhuar në zgjidhjen e kësaj çështje, situata do të ishte e qartë për çdokënd dhe mësimi online do të funksiononte më së miri si në çdo vend të botës.
