Një tender i ri po shfaqet në sfond dhe ky duket se do të shkundë xhepat e shoferëve këtë herë.
Është fjala për ndryshimin e lejes së qarkullimit e cila është parashikuar sërish të ndryshojë si modelim, dhe kjo do të jetë pa diskutim me një tender.
Një ditë më parë “Gazeta Reforma” e publikojë këtë lajm njoftimin për të cilin e bëri vetë Ministrja e Infrastrukturës Belinda Balluku.
Por sot, burime nga kjo ministri deklaruan për “Gazeta Reforma”, se projekti për “Ndryshimin e Lejes së Qarkullimit” nuk është një “iniciativë” e ministres Balluku, por një tender që do të zhvillohet me gjasë nga DSHTRR-ja, pra nga Blendi Gonxhe.
Të gjithë drejtuesit e automjeteve që do të jenë të detyruar për të ndryshuar lejen e qarkullimit, në fund duhet të paguajnë një shumë prej 2100 lekësh, por megjithatë kjo shumë nuk është përfundimtare pasi këtij dokumenti parashikohet që ti bashkëngjitet edhe ai i certifikatës së pronësisë së automjetit.
Si do të procedohet
Qytetarët nuk janë të detyruar të ndryshojnë lejen aktuale të qarkullimit të mjeteve sipas të dhënave paraprake nga Ministria e Infrastrukturës.
Pas miratimit të urdhrit të Ministrisë të Infrastrukturës për ndryshimin e formatit të lejes të qarkullimit, Drejtori i përgjithshëm i Drejtorisë të Shërbimit të Transportit Rrugor, Blendi Gonxhe, ka shpjeguar se, modeli i ri do të jepet vetëm për aplikimet e reja.
“Formati i ri i lejes të qarkullimit të mjetit rrugor të regjistruar, do të jepet vetëm për ata qytetarë që kryejnë veprime të reja me mjetin. P.sh ata qytetarë që do të merrnin lejen e re në çdo rast apo që kryejnë ndryshime. Të tjerët nuk detyrohen të ndryshojnë lejen e qarkullimit”,- ka deklaruar Gonxhe për mediat.
Gonxhe shpjegon se, leja e re e qarkullimit, nuk do të ketë afat vlefshmërie, vula kolaudimi dhe do të kushtojë 2100 lekë. Ndërkohë, leja aktuale për shkak të vulave të kolaudimit duhet të rinovohej, për kategori të caktuara mjetesh, çdo 5 ose çdo 10 vjet.
“Çmimi mendohet që do të jetë 2100 lekë, sepse do të ketë një letër speciale shumë më të kushtueshme sesa letra e zakonshme që përdoret sot dhe do të jetë e pajisur me elemente sigurie.
Dokumenti i ri do të unifikojë së bashku 3 në 1 dhe do të uli ndjeshëm me 40% koston që qytetari paguan aktualisht për këto dokumente (certifikata dhe leja ndërkombëtare) që në total, aktualisht i kushtojnë 3500 lekë.
Pra me lejen e re do të paguajë vetëm 2100 lekë. Do të kursejë dhe kohë dhe angari. Do të marrë 1 dokument me standard, si leja e mjetit të Gjermanisë”,- shpjegon Gonxhe.
Sipas kreut të Drejtorisë të Shërbimit Rrugor, leja e re shqiptare e qarkullimit do të kushtojë 17 euro, ndërsa në Kosovë kushton 25 euro dhe në Itali 30 euro.
Propozimi i ministrisë
Urdhri i Ministrisë të Infrastrukturës përcakton se Leja e re e qarkullimit të jetë e barasvlershme me certifikatën e pronësisë.
Prodhimi dhe plotësimi i lejes së re të qarkullimit të bëhet sipas rregullores së hartuar nga Drejtoria e Përgjithshme e Shërbimeve të Transportit Rrugor.
Përveç formatit të kartonit të ri, leja e qarkullimit do të përfshijë edhe certifikatën e pronësisë së automjetit që me gjasë do t’i bashkëngjitet asaj.
Aktualisht në Shqipëri ka dy kartona, një për lejen e qarkullimit dhe një tjetër për certifikatën e pronësisë së mjetit.
Ky ndryshim do të hyjë në fuqi së shpejti, edhe pse ministria nuk ka saktësuar një datë.
“Leja e re e qarkullimit do të jetë e barasvleshme me certifikatën e pronësisë. Prodhimi dhe plotësimi i lejes së re të qarkullimit të bëhet sipas rregullores së hartuar nga Drejtoria e Përgjithshme e Shërbimeve të Transportit Rrugor”,- shkruhet në urdhrin e ri.
Urdhri i ministres së Infrastrukturës, Balluku, parashikon që leja e re e qarkullimit të jetë në përputhje me direktivën Europiane nr.1999/37/EC të vitit 1999.
/GazdetaReforma.com/
