Situata sa vjen e përkeqësohet në kampin sirian Al Hol, ku ndodhen edhe 51 fëmijë nga Shqipëria. Kryqi i Kuq Ndërkombëtar i bën thirrje shteteve të tërheqin fëmijët nga ky kamp. Vetëm qeveria shqiptare nuk e dëgjon apelin e lëshuar të dielën.
Situata në kampin sirian
Bota ‘duhet të veprojë tani’ për gjendjen e fëmijëve të kampit Al Hol, para se të vijë dimiri, paralajmërojnë shoqatat humanitare, të cituara nga gazeta “The Telegraph”.
Gjendja e vështirë e një familje britanike ilustron rreziqet me të cilat përballen fëmijët në mes të frikës dhe varfërisë së kampit të refugjatëve Al Hol të Sirisë. Dy nga mijëra fëmijë të pambrojtur që jetojnë mes kushteve të dobëta në kampin e refugjatëve Al Hol, shkruante të dielën, gazeta britanike “The Telegraph”.
Fëmijët e nuseve të shtetit islamik ISIS, mund të mos ia dalin gjatë dimrit në kampet e refugjatëve sirianë të mbingarkuar me sëmundje, ku “The Telegraf” ka mësuar se po jetojnë në çadra të zhytura shpesh në disa metra ujë të ndyrë.
Komiteti Ndërkombëtar i Kryqit të Kuq (ICRC) u ka bërë thirrje qeverive që të bëjnë më shumë për të shpëtuar fëmijët e mbërthyer në kampe pasi nënat e tyre udhëtuan jashtë për t’u bashkuar me Shtetin Islamik.
Komiteti deklaron se fati i mijëra grave dhe fëmijëve të bllokuar në kushte të tmerrshme duhet të jetë më shumë një përparësi për vendet. Thirrja erdhi ndërsa një infermiereje nga Londra, e cila ka frikë se nipërit e mbesat e saj nuk do të mbijetojnë gjatë dimrit, nëse Qeveria dështon të marrë hapa urgjentë për t’i sjellë në shtëpi nga kampi Al-Hol, ku të paktën tetë fëmijë të tjerë kanë vdekur javët e fundit .
Charleen Jack-Henry tha se ministrat kishin një detyrë të kujdeseshin për ata fëmijë që, ashtu si nipërit e mbesat e saj, ishin tërhequr në zona lufte kundër vullnetit të tyre ose mirëkuptimit nga nuset e luftëtarëve.
Rriten vdekjet e fëmijëve
Tashmë ka pasur një rritje të niveleve të vdekshmërisë së fëmijëve në kamp, me nivele të vdekshmërisë nën pesë vjeç më shumë se tre herë më të larta se në fillim të vitit 2020.
Kryqi i Kuq i tha “The Telegrafit”: “Të gjitha vendet duhet të bëjnë të gjitha përpjekjet e mundshme për të riatdhesuar qytetarët e tyre, në mënyrë të ligjshme dhe duke respektuar të drejtat themelore. Fati i mijëra grave dhe fëmijëve të bllokuar ose të ndaluar në kushte të tmerrshme duhet të jetë një përparësi për të gjitha vendet. Është thelbësore që fëmijët të trajtohen para së gjithash si viktima, pavarësisht se me kë ishin lidhur ose prindërit e tyre. ”
Sipas Kryqit të kuq ndërkombëtar, “Uniteti i familjes duhet të jetë norma, ndërsa shtetet planifikojnë riatdhesimet. Mbajtja e familjeve të bashkuara dhe të lidhura nuk është thjesht ajo që është në interesin më të mirë të fëmijës, por është edhe ajo që e kërkon ligji ndërkombëtar përveç nëse justifikohet ndryshe përmes vlerësimit rigoroz. ”
Tetë fëmijë nën pesë vjeç vdiqën në kampin Al Hol brenda pesë ditëve këtë verë, pasi shërbimet shëndetësore dhe të ushqyerit ranë me shpejtësi, madje edhe përpara dimrit. Ata përfshinin dy fëmijë irakianë, një fëmijë sirian dhe të paktën tre me kombësi të huaj.
“Save the Children” njofton se vdekjet e tyre ishin të lidhura me shkaqe të tilla si atak i zemrës, gjakderdhja e brendshme dhe kequshqyerja e rëndë. “Duhet të ndërmerren veprime të menjëhershme nga të gjitha palët për të parandaluar tragjedi të mëtejshme,” tha Drejtorja e Reagimit për Sirinë e “Save the Children”, Sonia Khush. “Ne po shohim një dështim kolektiv në të gjitha nivelet për të mbrojtur fëmijët.”
/GazetaReforma.com/
