Zonja e Parë e SHBA-ve, Melania Trump, ka rrëfyer në një postim të bërë në faqen e Shtëpisë së Bardhë eksperiencën e saj me koronavirusin. Përveç saj dhe presidentit Donald Trump, Melania ka zbuluar se është infektuar dhe djali i tyre 14-vjeçar, Barron.
Ky i fundit rezultoi negativ në momentin që u infektuan Melania dhe Donald, por pas një testi të dytë doli pozitiv. Zonja e Parë ka treguar se Barron nuk kishte simptoma dhe se tani është shëruar. Përsa i përket simptomave të saj, Melania ka treguar: “Ishin minimaliste, por më goditën të gjitha në të njëjtën kohë”. Ajo është shprehur se kishte dhimbje trupi e kokë, kollë dhe ndihej shumë e lodhur.
Ndryshe nga bashkëshorti i saj, Melania, nuk shkoi në spital për trajtim, por vetëm u izolua në shtëpi. Ajo ka treguar se ka ndjekur një metodë më natyrale për trajtimin e koronavirusit, duke u mbështetur tek vitaminat, ushqimet e shëndetëshme dhe jo tek ilaçet.
Ndryshe nga Trump që nuk i përfillte masat mbrojtëse si mbajtja e maskës, Melaina tregohej më e kujdesshme, mirëpo edhe ajo është shfaqur disa herë pa mbajtur barrierë mbrojtëse në ambientet publike.
