Bashkia e Tiranës, ka bërë një tender të dyshimtë “redflag”, me mjetet parandaluese (si maska, dezifektantë) anti-covid për furnizimin e kopshteve dhe çerdheve.
Bazuar në Agjencinë e Prokurimit Publik, deri më tani mësohet se 8 kompani që u skualifikuan nga gara për këtë tender, kanë dërguar pesë ankesa në Agjencinë e Prokurimit Publik, në lidhje me kompaninë që fitoi tenderin. Në garën për 37 milionë lekë ka mbetur vetëm një kompani dhe kjo vinte dyshime mbi mënyrën e selektimit dhe përzgjedhjes së kompanisë.
Ndërkohë që Komisioni i Prokurimit Publik dhe Autoriteti Kontraktor, kanë deklaruar se ankesat e 8 kompanive të përjashtuara nga gara e tenderit, nuk janë marrë parasysh. Si pasojë, Open Data Albania, ka bërë me “flamur të kuq”, (redflag) këtë tender të fituar në mënyrë të dyshimtë, për abuzim të mundshëm të autoriteteve përkatëse në përzgjedhjen e këtij tenderi.
Kujtojmë se tenderi ka për qëllim blerjen e pajisjeve të nevojshme për çerdhet dhe kopshtet për përballimin e situatës së pandemisë.
Flamuri i kuq (red flag) i një procedure prokurimi, tregon një ekspozim apo rrezik të mundshëm për sjellje të papajtueshme me ligjin ose jo-etike të biznesit, kryesisht në lidhje me mos-respektimin e ligjeve anti-korrupsion. Vlerësimi për këto kategori do të bëhet në mënyrë automatike, me filtra analitik të paracaktuar.
Drejtoria e Përgjithshme e Çerdheve dhe Kopshteve, (DPÇK), e ka hapur procedurën me një fond limit prej 37 milionë lekësh. Kësaj oferte i janë përgjigjur 9 kompani, 8 prej të cilave janë skualifikuar në mënyrë të dyshimtë, duke lënë kështu në garë vetëm kompaninë fituese të këtij tenderi, W Center.
Në lidhje me blerjen e mjeteve të nevojshme anti-covid për përballimin e pandemisë, si maskat, dorezat, xheli dezinfektues apo sapunët, subjekti W Center ka bërë ofertën prej 34.3 milionë lekë të reja pa TVSH.
Nga ana tjetër, duke u bazuar në të dhënat e Agjencisë së Prokurorimit, ky prokurim rezulton të jetë shoqëruar me disa ankesa.
Bëhet me dije se 3 prej kompanive pjesëmarrëse në garën për fitimin e tenderit, i janë drejtuar autoritetit kontraktor, prej të cilit kanë marrë përgjigje por jo zgjidhje.
Kështu si pasojë, dy prej operatorëve kanë paraqitur ankesë në Komisionin e Prokurimeve Publike, i cili ka pranuar vetëm ankesën e subjektit W Center, për të cilin ka kërkuar kualifikimin dhe plotësimin e kushteve për fitimin e këtij tenderi.
W-Center, pas kërkimit nga Iconstyle.al, rezulton të jetë një kompani me qendër në Kashar, në rrugën Dritan Hoxha, e cila prodhon dhe shet detergjentë për lavanderitë, mjete dezinfektuese, makineri pastrimi, shërbime kozmetike të hotelerive.
Lëvizja dyshuese për fitimin e këtij tenderi u vu re pasi Drejtoria e Çerdheve dhe Kopshteve (DÇK), për këtë prokurim kishte vendosur skualifikimin e të gjithë operatorëve pjesëmarrës në garë, por pas ndërhyrjes nga ana e Komisionit të Prokurimeve Publike, fitues është shpallur subjekti ankimues W Center.
