Si të mos mjaftonte menaxhimi i Parkut të Butrintit nga një kompani angleze, qeveria Rama ka vendosur të japë me koncesion edhe liqenin “Xarrë-Bufi” në Butrint. Këtë herë kryeministri ka menduar të shpërblejë përmes kësaj marrëveshjeje një nga miqtë e tij, Gjergj Lucën, që e ka ndihmuar sa herë për mbledhjet e socialistëve në fshatin Labinot.
Koncesion sipas skemës “kontratë e plotë vetëm 1 euro”
Gjergj Luca, që njihet si administrator dhe pronar i kompanisë “Rozafa Shpk”, ka marrë me koncesion për 10 vite liqenin “Xarrë-Bufi” sipas skemës “kontratë e plotë vetëm 1 euro”. Kjo është një nga zonat më të preferuara nga bizneset vendas e të huaj, sepse është shumë e famshme për midhjet. Mirëpo kryeministri Rama dhe ministri i Bujqësisë, Blendi Çuçi, kanë organizuar një garë formale për t’ja dhuruar liqenin mikut të tyre.
Edhe pse koncesioni është me afat 10 vite, mund të përsëritet sërish për 20 vite të tjera pa garë, por vetëm me një rinovim letrash të kontratës aktuale. Për të fituar koncesionin Luca është bashkuar me një firmë “KlerisB Shpk”, që ka vetëm 4 muaj që është aktive, duke u regjistruar në QKB në 2 maj të këtij viti. Si një firmë e re në këtë fushë, është disi e pakuptueshme se si qeveria i ka besuar “KlerisB Shpk” që të bashkëpunojë me “Rozafa Shpk” për shfrytëzimin e pasurive të liqenit.
“Xarrë-Bufi” do të përdoret nga të dyja kompanitë në fjalë për peshkim artizanal dhe kultivim midhjesh, turizëm nëpërmjet kanalit që e lidh me liqenin e Butrinti, si dhe për aktivitete të tjera në territorin tokësor rreth liqenit.
Kush është Gjergj Luca?
Gjergj Luca nuk është emër i panjohur për shqiptarët, sepse ai ka marrë në dorë pasuri të shumta nga veriu në jug të vendit. Administratori dhe pronari i “Rozafa Shpk” ka marrë falë kryeministrit Edi Rama 3000 m2 truall e det në Portin e Shëngjinit, 135 mijë m2 objekte, tunele e troje të Rezervave të Shtetit në Elbasan e reparteve ushtarake në Prrenjas-Librazhd dhe së fundmi liqenin “Xarrë-Bufi”.
Vetëm 3 muaj më parë Luca u përball me banorët e Labinot-Fushës në Elbasan, të cilët u ngritën në protestë kundër fabrikës së peshkut të biznesmenit. Qytetarët u shprehën të revoltuar, sepse Gjergj Luca përveçse ka kontribuar në ndotjen e lumit Shkumbin me fabrikën e tij, u ka zaptuar edhe pronat e tyre private. Mirëpo duke pasur mbështetjen e pushtetit, Luca ja doli mbanë në luftën përballë banorëve të Labinot-Fushës, madje duke mos ua përtuar as ofendimet me sjelljen e tij arrogante.
Nuk do të na bënte përshtypje nëse e njëjta situatë do të përsëritej në liqenin “Xarrë-Bufi”, për sa kohë Luca do e ketë në dorë për 10 vite me radhë dhe do të vazhdojë të ketë përkrahjen e miqve me pushtet.
