Katër persona u plagosën me thikë në Paris të Premten pranë ish zyrës së Charlie Hebdo – vendi ku ndodhi një sulm terrorist në vitin 2015 që synonte gazetën satirike – thanë autoritetet.
Jean Castex, kryeministri francez, ndërpreu një fjalim të planifikuar, duke thënë se një “ngjarje e rëndë” sapo kishte ndodhur në kryeqytet.
“Një sulm me thikë u krye në lagjen 11 përpara ish-zyrave të Charlie Hebdo”, tha Castex, duke shtuar se dy nga të plagosurit ishin në gjendje kritike.
Autoritetet lokale thanë se policia po kërkonte një individ “potencialisht të rrezikshëm” në lindje të kryeqytetit.
Emmanuel Grégoire, nënkryetari i Komunës së Parisit, në një postim në Twitter u bëri thirrje njerëzve të shmangin lagjen Richard-Lenoir – ku Charlie Hebdo kishte zyrat e saj para sulmit terrorist në janar 2015 që la të vdekur 12 persona.
Policia e Parisit nisi një operacion të gjerë në zonë, por nuk dha detaje.
Al Qaeda, grupi terrorist, kohët e fundit kishte lëshuar kërcënime të reja kundër Charlie Hebdo, gazeta e cila u zhvendos pas sulmit në zyra shumë më të sigurta diku tjetër.
Kërcënimet pasuan vendimin e gazetës për të ribotuar karikaturat satirike të Profetit Muhamed në hapjen e gjyqit të disa personave të akuzuar që kishin ndihmuar sulmuesit.
/nytimes.com
