I është dhënë lamtumira e fundit qenit i cili u tërhoq zvarrë nga i zoti, ndërkohë që ishte lidhur në mënyrë makabre në makinën e tij për qafe, javën e kaluar në Sukth.
Fotot ku ndërroi jetë qeni janë publikuar në Facebook nga Jenny Hasanaj Muller, e cila është një aktiviste që i ndjek me kërshëri çështje të ndjeshme si ajo që dëshmuam me sytë tanë dhe na lëndoi të gjithëve.
Qirinj në formë zemre dhe lule janë vendosur në tokë, bashkë me fotografinë e trishtë ku qeni shfaqet duke u tërhequr zvarrë nga shtetasi F. P., 50 vjeç, banues në Sukth, Durrës.
E ndërkohë që në media u harruan këto pamje të trishta të keqtrajtimit të kafshës së gjorë, ne shtrojmë me ngulm edhe njëherë çështjen e keqtrajtimit të kafshëve, e cila nuk tregon gjë tjetër veçse një shuarje të njerëzimit dhe mungesë të ligjeve që dënojnë të tilla krime.
https://www.instagram.com/p/CFJqtvdg_sF/?utm_source=ig_embed
Aktualisht, prokuroria e Durrësit nuk e ka dhënë ende masën e sigurisë për 50-vjeçarin. Blutë njoftuan javën e kaluar se pas identifikimit ai u shoqërua në Komisariat për t’u proceduar penalisht për veprën “Keqtrajtimi i kafshëve” parashikuar nga neni 207/c paragrafi 2 si dhe u tha se nga shërbimet e Policisë të Qarkullimit Rrugor është vendosur masë administrative, pra gjobë, në bazë të dispozitave të Kodit Rrugor, sipas neneve 158, 182 dhe 139/14/5/8.
“Materialet i kaluan Prokurorisë së Rrethit Gjyqësor Durrës, për veprime të mëtejshme”, thuhej më tej në njoftim, ndërkohë që nga prokuroria nuk ka asnjë zë.
Në një komunikim për “iconstyle.al” Jenny Hasanaj Muller e cila drejton shoqatën “JETA, Tier und Mensch” (JETA, Kafshët dhe Njerëzit), me bazë në Zvicër dhe që operon në Shqipëri, u tha se do të ngrihet një peticion për çështjen në fjalë, për të cilën druhet se mund të lihet thjesht me një gjobë financiare.
Ajo u shpreh për “iconstyle.al se personi është liruar pasi, kështu janë procedurat deri sa çështja të kalojë në gjykatë:
“Personi nuk është në burg ështe liruar, keshtu jane procedurat deri sa çështja të shkojë në gjykatë thuhet se është i pafajshëm. Ne do të bëjmë peticion mbi rastin. Dimë nga disa fëmijë që kanë qenë në vendngjarje, se qeni ka vuajtur dhe ka ulëritur kur është tërhequr nga makina dhe dimë nga informacione që njohin dikë në polici që një gjobë shumë e vogël i është dhënë personit F.,P., për ligjet rrugore që ai ka thyer. Kjo për mua nuk mund të shpallet si fakt”.
Nga ana tjetër, burime nga Policia e Durrësit konfirmojnë jozyrtarisht për “iconstyle.al” se personi do të dalë të nesërmen ose një ditë më pas për t’u njohur me masën e sigurisë para gjykatës.
Në ligjin për mbrojtjen e kafshëve, thuhet se “Cilido që, i motivuar nga ligësia apo pa arsye vret një kafshë, dënohet me burgim nga gjashtë muaj deri në dy vite”!
Shpresojmë që drejtësia të vihet në vend!
