Mësuesi i shkollës së mesme të fshatit Hudënisht në Pogradec, Nardi Xhemollari, i cili ndërroi jetë pak ditë më parë nga virusi COVID-19, u jepte gjithmonë një këshillë nxënësve të vet: “Mësoni që të bëheni dikushi në jetë”!
Sot ai mund të ishte në tryezën e tij, duke dhënë mësim përpara nxënësve, por virusi i mori jetën në moshën 47-vjeçare.
“ABC News” ka shkuar në shkollën ku mësuesi i ndjerë jepte mësim, ku tryeza e tij mbetet bosh.
Kolegët e tij dhe nxënësit shprehen të tronditur për këtë humbje të madhe.
“Kemi keqardhje ishte ndër profesorët më të mirë që kishim”, thotë një nxënës.
“S’mund ta zëvendësojë askush”, thotë një tjetër.
“Në sallën e mësuesit karrigia e tij është bosh”.
“Shtangëm. Sikur na ra një rrufe. Ishte shembull i figurës së mësuesit”, shprehet profesori.
Drejtori i shkollës “Dëshmorët e Pojskës”, Alban Blaceri ka pasur njohje të vjetër pasi janë një brez dhe kanë ndjekur bashkë universitetin. Ai tregon se kishte biseduar me të para se të shtrohej në Sanatorium.
“Vetëm telefonata kam pasur. Më tregoi se kishte temperaturë në telefon dhe priste të bënte tamponin. Pas tre ditë më pas më tha po shtrohem në Sanatorium”, thotë drejtori.
Nardi ndante dhe batuta me kolegët.
“Bënte batuta për çdo situatë sikur i kishte të shkruara gati”, shprehet mësuesi.
“Mësimi s’më duket fare i vështirë thoshte si t’ia bëjmë problemeve familjare”, thotë një mësuese.
/abcnews.al
