A mund të mbajë përgjegjësi një prind për fëmijën e tij dhe të deklarojë nëse ai është i infektuar apo jo me COVID-19 pa e testuar fillimisht? Po një nxënës i moshës 6 vjeç e lart a mund të thotë me siguri se nuk është i infektuar dhe të mbajë përgjegjësi për këtë pjesë?
Teksa dita e parë e shkollës i gjeti fëmijët e prindërit me formularët absurdë të Ministrisë së Arsimit në duar, ku u kërkohet të deklarojnë “nëse janë të prekur me COVID, ata vetë ose familjarë”, ne nuk mund të rrimë pa shpjeguar arsyen reale të këtij absurditeti.
Duke qenë se prindërve nuk ju kërkohet dot tamponi i COVID-19, pikërisht sepse u duhet të paguajnë 100 euro minimumi për ta bërë atë në laboratorët privatë, atëherë po ju kërkohet të plotësojnë një formular, krejt me hamendje.
Si mund ta dijë një prind nëse e ka fëmijën e tij të infektuar, pa i bërë atij fillimisht një tampon, duke qenë se shumë fëmijë janë asimptomatikë?! Nëse ky formular i Ministrisë presupozohet që të zëvendësojë një test Covid-i, atëherë s’do të kemi nevojë aspak të vrapojmë drejt laboratorëve, por do të bëhemi doktorë dhe laborantë të vetes.
Shqiptarët po paguajnë më shumë se kushdo në rajon për kryerjen e analizave serologjike dhe tamponit (KLIKO), në një kohë që duhet të ishin falas sipas ligjit, veçanërisht në këtë periudhë kur hapja e shkollave pritet të rritë edhe numrin e të infektuarve.
Ajo që është edhe më absurde është fakti që ministria u ka lënë përgjegjësinë nxënësve që të raportojnë të parët sapo të hasin me një rast të infektuar nga pandemia. Pra një i mitur, ndoshta dhe në klasë të parë, do të mbajë përgjegjësi nëse ka pasur kontakte me të infektuar nga pandemia.
Po si mund t’i jepet një përgjegjësi e tillë një fëmije që ndoshta ende nuk e ka kuptuar mirë, se çfarë do të thotë pandemi, koronavirus, apo nuk ka mësuar as si të firmosë?
Për më tepër që një i mitur nuk mund të mbajë përgjegjësi ligjore/penale, deri në moshën 14 vjeç (Shiko këtu), ndërsa më herët për përgjegjës ligjor për të është prindi apo kujdestari.
Por edhe nëse për fëmijët e klasës së parë, formularin duhet ta plotësojë prindi, atëherë nga do ta dijë me siguri nëna apo babai i një fëmije asimptomatik, që fëmija i tij ka virus?
