Vëllai i Eglantina Bucit, Shkëlzeni, i cili akuzohet se ka vrarë të motrën, ka mohuar përfshirjen në këtë krim dhe ka kërkuar që dëshmitari të tregojë të vërtetën.
Ai shprehet se nuk di të qëllojë me armë, dhe madje edhe për vrasjen e kryer në 2017-n, për të cilën ndodhet në burg, thotë se edhe për atë krim, nuk kishte bërë kryerje të saktë.
Mes të tjerash, Shkëlzeni ka thënë se e ka shpirtin e djegur për të motrën, që e çuan e bënë copa në Malin me Gropa.
“Dëshmitari duhet të tregojë të vërtetën. Për mua mjafton që të gjejë personi i vërtetë që ka vu dorën mbi motrën time, dhe unë le të vdes. S’kam asnjë kompleks për dënimin. Kam shpirtin e djegur dhe të përvëluar. Mbas vuajtjes e çuan e bënë copa në Malin me Gropa dhe na nxorën familje horror. Do të lutem, shokut tim i drejtohem, që t’i nxjerr të gjitha të vërtetat. Mos hidh baltë se unë jam në burg, se unë jam në burg e babai im po. Se kam bërë një krim, s’do të thotë se jam kriminal, e thua se kam vrarë motrën time. Kam besim tek drejtësia se kjo çështje do të hetohet.
E kam besimin tek gazetaria më shumë. Nëse unë kam marrë pjesë tek këto itinerare, një nga detajet do e nxjerrin të vërtetën. Unë nuk mund të identifikojë askënd për sa kohë që unë nuk kam prova. Se po të kisha prova s’do kisha ardhur këtu. Do i kisha bërë lëvizjet e mia, me shtet, pa shtet. S’mund të identifikojë një njeri specifik. Unë di të them një gjë që; i lutem zotërisë, që të tregohet i sinqertë pa komplekse, pa presione. Të tregojë të vërtetën, siç e dinë. Jo të shpifë, Në fund të fundit çdo gjë duhet të provohet”, tha Buci në një prononcim për News 24.
Eglantina Buci u ekzekutua me armë zjarri 8 vite më parë, ndërsa trupi i saj u fsheh në Malin me Gropa, por pak kohë më pas eshtrat e saj u gjetën rastësisht nga persona të tjerë të cilët njoftuan autoritetet.
Lidhur me ngjarjen janë akuzuar vëllai i saj Shkëlzen Buci në rolin e ekzekutorin dhe babai i saj, Faik Buci në rolin e organizatorit të vrasjes.
Edhe Elona, motra e Eglantina Bucit, ka thënë në dëshminë e saj, se vëllai Shkëlzeni nuk ka bërë asgjë në kokën e tij dhe për gjithçka nxitej nga babai 66-vjeçar, madje edhe për atentatin ndaj aktorit Mishel Prela për të cilin ndodhet duke vuajtur dënimin me burg.
/abcnews.al
