Studentët kanë zbrazur shkollat për të protestuar kundër rizgjedhjes së diskutueshme të presidentit autoritar të Bjellorusisë, Alexander Lukashenko.
Policia Bjelloruse konfirmoi se të paktën 40 studentë protestues u arrestuan të martën në kryeqytetin Minsk pasi u përplasën me policinë, ndërsa demonstratat kundër rizgjedhjes së Lukashenko-s hynë në javën e katërt.
Protestat paqësore të studentëve u përballën me një përgjigje të ashpër nga oficerët e sigurimit Bjellorus. Videot e shpërndara në mediat sociale dhe imazhet e agjencive të lajmeve tregojnë oficerë të kamufluar që godisnin studentët, dhe më pas i tërhiqnin zvarrë për t’i futur në furgonë.
Disa mbanin parulla që kërkonin liri për të burgosurit politikë, ndërsa automjetet që kalonin u binin borive në formë mbështetjeje.
Qendra e të drejtave të njeriut Viasna, raportoi se të paktën 62 persona u arrestuan, përfshirë 8 gazetarë. Euronews ka sjellë imazhe të protestuesve të plagosur që thonë se u sulmuan nga policia.
“Ky regjim është i bazuar në gënjeshtra dhe dhunë, dhe ai kurrë nuk do të na mbrojë”, thotë Nadia, një studente që mori pjesë në protestë.
“Çdo ditë njerëzit po rrihen dhe po mbahen të burgosur, por ne vazhdojmë, sepse duam që ky tmerr të marrë fund”.
“Ne duam të jetojmë në këtë vend, por duhet ta ndërtojmë vetë ëndrrën tonë”, tha një tjetër studente, Anastasia për Euronews.
“Unë nuk kam frikë nga arrestimi por kam frikë të jetoj me këtë dhunë dhe diktaturë që unë shoh”, thotë ajo.
“Shokët dhe familja ime nuk e shohin një të ardhme në këtë vend me qeverinë aktuale,” shtoi Veronica, e cila gjithashtu mori pjesë në demonstrata në Minsk të martën.
Protestat masive në Bjellorusi shpërthyen muajin e kaluar pas zgjedhjeve të 9 gushtit, të besuara gjerësisht nga protestuesit se ishin manipuluar për t’i dhënë Lukashenkos një mandat të gjashtë.
Vlerësimet nga aktivistët dhe media lokale sugjerojnë se midis 3,000 deri në 5,000 studentë marshuan të martën në Sheshin e Pavarësisë në qendër të qytetit.
I quajtur shpesh si diktatori i fundit i Evropës, Lukashenko ka qeverisur Bjellorusinë për 26 vjet. Muajin e kaluar, Presidenti iu përgjigj thirrjeve për dorëheqjen e tij duke postuar një seri të çuditshme videosh së tij në një helikopter, duke fluturuar mbi Minsk me një pushkë të varur në shpatullën e tij.
