Njëri nga punonjësit e pikës së motorave me qira që ka pikasur Indrit Bajraktarin të dalë nga deti pa 17-vjeçaren Enisa Doda, ka rrëfyer sesi i riu mashtroi për vendndodhjen e vajzës.
Arman Alla ka pohuar për “Shqiptarja.com” të gjithë dinamikën e krimit dhe mashtrimet e Indrit Bajraktarit, për t’i shpëtuar mbikëqyrjes së punëtorëve, të cilët e mbanin nën kontroll derisa të tregonte se ku e kishte lënë vajzën, me të cilën hyri në det por nuk u kthye.
Fillimisht pasi doli i vetëm nga deti, Bajraktari, ka filluar t’i gënjejë, duke i pohuar se: “…vajzën e kam gocë xhaxhai, dhe e kam çuar te xhaxhai…”.
Mandej u ka dhënë një alibi tjetër, duke i treguar se “…vajzën e kam çuar në Velipojë dhe ka dalë shëtitje me xhaxhain e saj…”.
Për të verifikuar këto thënie punëtorët e pikës së motorëve me qira, e kanë çuar Indrit Bajraktarin në qendër të Velipojës, për të vërtetuar nëse vajza që ai mori me vete në det ishte gjallë apo jo.
Duke lëvizur nëpër qendër të plazhit Velipojë, Arman Alla shpjegon: “Indriti përsëri ka dashur të më mashtrojë duke më thënë “…a të hyj, e të marr një shishe në supermarket…?“ Armani e ka lejuar. Indrit, ka hyrë në market, por Arman Alla dyshimet nuk i ka hequr nga ai. E ka ruajtur dhe përsëriri ka tentuar për tu larguar me vrap me anë të një motori tip “Papaç” me të cilin kishte udhëtuar, nga fshati Postribë, në drejtim të Velipojës, aty ku po pushonte familja e 17-vjeçares Doda.
Kur Armani Alla e ka parë se po largohej me motor, ka mundur ta ndalojë me forcë. I ka marrë çelësin e motorit, me qëllim për t’i treguar të vërtetën se çfarë kishte ndodhur me atë vajzë që ai futi në det. Pas këtyre peripecive që Armani ka kaluar me Indrit Bajraktarin, duke parë edhe kundërshtimin e tij për të mos treguar, ka njoftuar menjëherë disa shokë të tij të punës, të cilët i kanë shkuar menjëherë.
Dhe me anë të dhunës, e kanë mbajtur deri sa ai t’u tregonte të vërtetën për atë vajzë që futi në det. Pas këtyre veprimeve, Arman Alla, ka njoftuar policinë e Velipojës dhe nga presioni i dyanshëm, ai ka thënë se: “…vajza ka rënë në det, është mbytur…”.
Vajza 17-vjeçare Enisa Doda, është gjetur e mbytur në orët e para të mëngjesit të datës 20 gusht, rreth 1200 metra larg nga bregu.
Sipas peshkatarit Sabedin Sula, që konstatoi trupin e pajetë mbi ujë, adoleshentja kishte në qafë të varur çelësin e motorit të ujit, që kishin marë me qira së bashku me Indrit Bajraktarin.
/Shqiptarja.com
