Viti i ri shkollor në Maqedoninë e Veriut nuk do të fillojë më 1 shtator, por më 1 tetor.
Kryeministri Zoran Zaev bëri me dije se për shkak të përgatitjes së protokollit shëndetësor, hapja e shkollave është shtyrë për më vonë.
“Viti shkollor nuk do të fillojë më 1 shtator. Për shkak të përgatitjes së protokolleve shëndetësore, mësimi duhet të nisë më 1 tetor. Vendimi do të merret në seancën e parë të qeverisë, në të cilën do të miratohen edhe ndryshimet ligjore për mbarëvajtjen e procesit mësimor”, tha Zaev gjatë dorëzimit në kuvend të përbërjes së re të qeverisë, e cila, siç bëhet e ditur, do të votohet deri në fund të javës.
Komisioni për Sëmundje Infektive në Maqedoninë e Veriut i ka rekomanduar qeverisë që mësimi të nisë në shkolla për nxënësit nga klasa e parë deri në të tretën, ndërsa fëmijët që nuk duan të rikthehen në shkolla, mësimin mund ta ndjekin online, paralelisht me nxënësit tjerë me prani fizike.
Për klasat e tjera të arsimit fillor dhe të mesëm, mësimi u vendos që të mbahet online, por ky vendim krijoi shumë pakënaqësi, pasi ashtu si në Shqipëri, edhe në Maqedoni pati një zhgënjim total për mësimin online të karantinës.
E ndërkohë që nxënësit në Maqedoni mund të bëjnë mësim të kombinuar, me prani në shkollë dhe mësim nga distanca apo online, në Shqipëri nxënësit po përgatiten për mësim deri në darkë.
Minsitria e Arsimit e ka parë të arsyeshme pas konsultimit me Ministrinë e Shëndetësisë, që mësimin ta fillojë në shkollë. Hapja e tyre në shtator ka krijuar shumë konfuzion në vend në lidhje me mënyrën sesi do të bëhet mësimi, në një kohë që ka mjaft shkolla që janë dëmtuar nga tërmeti (lexo këtu).
Sot u publikua draft udhëzimi, i cili parashtron tre skenarë për zhvillimin e mësimit, njëri prej të cilëve parashikon edhe përkeqësimin e situatës me COVID-19 në vend.
Nxënësit do të mund ta ndajnë mësimin në turne, dhe në varësi të tyre, ata parashikohet të mbahen në klasa deri në orën 19:45 (lexo këtu).
Sipas udhëzimit, mësimi do të zhvillohet vetëm në distancë, në rast se situata e COVID-19 përkeqësohet shumë në nivel kombëtar, në nivel lokal ose në nivel shkolle. Por nisur nga eksperienca e vendeve të tjera si Izraeli, kemi frikë se nuk do të kalojë shumë kohë deri kur shkollat të kthehen në vatra virusi.
/Iconstyle.al
