Pak ditë pasi u vu në pranga për mbytjen e 17-vjeçares Enisa Doda në Velipojë, Indrit Bajraktari është lënë në burg nga gjykata.
Ky i fundit ka folur për herë të parë rreth ngjarjes në seancën e mbajtur mëngjesin e së dielës, ku ka deklaruar se është rrëzuar nga mjeti së bashku me vajzën.
25-vjeçari është shprehur se ka rënë pa ndjenja dhe se nuk mban mend asgjë.
“Kur jam kthjelluar, ka ardhur një çift me motor dhe më kanë thënë se do njoftojnë që të më marrin. Kam pasur frikë, nuk e dija se çfarë ka ndodhur dhe ndaj tentova të largohesha.”
Më tej i riu është shprehur se vajzën e ka njohur pasi njeh dhe familjen, “sepse e ka motrën në Angli”.
“Nuk kemi pasur jelek shpëtimi. Unë kam qenë duke i dhënë motorit dhe jemi larguar shumë nga bregu. Nga era dhe nga dallgët kemi rënë të dy nga motori,” është shprehur më tej Bajraktari.
Dy të rinjtë kishin marrë me qira një motor uji rreth orës 14:00 të pasdites së mërkurës. Sipas policisë Bajraktari ka dalë nga deti pa vajzën dhe pa motorin e ujit, ndërsa adoleshentja u gjend pa shenja jeta disa qindra metra nga bregu.
17-vjeçarja nga Burreli që jetonte në Bathore, kishte ardhur me pushime në Velipojë bashkë me familjen e saj. Ndërsa 25-vjeçari nga Postriba ishte emigrant në Londër dhe kishte ardhur në Shqipëri për pushime.
Dy të rinjtë dyshohet se ishin njohur në rrjetet sociale, por i riu ishte i martuar në Londër.
/ABC News
