Në kushtet që jemi me 3743 raste aktive me koronavirus në vend, nxënësit nuk ndihen gati për hapjen e shkollave në shtator!
Sipas një sondazhi të publikuar nga iconstyle.al, vetëm 63% e pjesëmarrësve ishin dakord për hapjen e shkollave me kushtin e vetëm që të respektohen masat. Pjesa më e madhe e tyre ishin zhgënjyer nga mësimi online i karantinës, që u cilësua si një dështim total i Ministrisë së Arsimit.
Themi “vetëm” sepse nuk është zgjedhje e tyre me dëshirë, por zgjidhje nga halli që i japin problemit të shkollimit. Dhe kjo shifër, që përkthehet në jetë njerëzish në periudhë pandemie, do të ulet shumë më shumë kur këta njerëz, (që qeveria mendoi se iu plotësoi dëshirat për të marrë mandatin), të përballen me pasojat që do të sjellë vendimi i nxituar i hapjes së shkollave, që rrjedhimisht do të paguhet me votë.
Pikërisht, të zhgënjyer nga mungesa e internetit falas, programeve që mundësojnë gjithëpërfshirjen, angazhimin e mësuesve dhe leksioneve aspak aktive, shumë nxënës, prindër e mësues zgjodhën alternativën e hapjes së shkollave në shtator, edhe përkundrejt rrezikut për përhapjen e infeksioneve.
71% mendonin se do të ketë shtim të rasteve me COVID-19 dhe se masat nuk do të zbatoheshin 100%. Madje 35 % thoshin se duke qenë se masat nuk po respektohen as në supermarkete, atëherë është e kotë të mendosh se do të respektohen në shkollë, aq më tepër nga fëmijët.
Gati 40% kishin frikë të riktheheshin në shkolla si pasojë e pasigurisë që ndiejnë në periudhë pandemie. Dhe në fakt, në adresë të iconstyle.al kanë në ardhur mjaft mesazhe nga prindër që shprehin shqetësimin për ta dërguar fëmijën në shkollë, me klasat që janë mbi 35 nxënës.
“Bëni diçka sepse është e pamundur që fëmijët tanë të shkojnë nëpër shkolla në këtë kohë duke cenuar shëndetin e tyre por edhe shëndetin tonë njëkohësisht. Unë si prind nuk mund ta dërgoj fëmijën tim në këtë kohë në shkollë ku ka 37 nxënës në klasë. Bëni diçka të ndryshohet ky njoftim”, shprehej një nënë e shqetësuar.
Ministria e Shëndetësisë nuk ka publikuar ende një udhëzim të saktë apo protokoll sigurie për mësimin në shkollë. I vetmi udhëzim që u publikua ishte ai i djeshmi (lexo këtu), që parashikonte se “kur është e mundur, të praktikohet mësimi në ambient të hapur (oborri i institucionit)”.
Të kthehemi në shkollë, sepse mësimi online dështoi!
Pas kritikave se hapja e shkollave u bazua mbi një sondazh, përfundimet e të cilit nuk janë kalkuluar, sot janë publikuar rezultatet nga ministria, ku 89% e prindërve shprehen që shkollat të fillojnë procesin mësimor normalisht, me kapacitet dhe funksionim të plotë.
Agjencia e Sigurimit të Cilësisë së Arsimit Parauniversitar bën me dije se të dhënat e këtij sondazhi vijnë nga deklarimet e nxënësve, prindërve dhe mësuesve në lidhje me fillimin e vitit shkollor 2020-2021, ku në total morën pjesë 135 221 persona: 18 665 mësues, 60 248 nxënës dhe 56 308 prindër.
Por a nuk janë këta të njëjtët prindër e fëmijë që u zhgënjyen nga mësimi online?! Prej vitesh nxënësit, prindërit dhe mësuesit janë gënjyer me pretendimet se teknologjia do të ishte pjesë e mësimdhënies duke harxhuar miliona euro për klasat inteligjente dhe një duzinë burimesh financiare për Reformën Kurrikulare.
Pra nxënësit do kthehen në klasa, sepse nuk ka asnjë mundësi tjetër mësimi dhe kjo duket qartë!
Viti shkollor 2019-2020 u mbyll me 17-18 javë mësimi nga 35-36 të parashikuara, pasi tre muajt e karantinës nuk u klasifikuan, sepse qeveria dështoi ta bënte.
Kështu me hapjen e nxituar të shkollave në shtator pa ndonjë plan masash të sigurt, vetëm për të mos e humbur vitin akademik ose për të mos krijuar pakënaqësi pak muaj para zgjedhjeve, ky vendim do t’i kthehet si një bumerang arsimit në vend.
Pikëpyetjet që duan përgjigje!
-Tërmeti i 26 nëntorit, dëmtoi mjaft godina të cilat e sot e kësaj ditë janë jo funksionale, në një kohë që me hapjen e shkollave në shtator, do të duhet të përgjysmohet numri i nxënësve. Ku do të zvhillohet mësimi?
-Shumë shkolla në Tiranë dhe Durrës, edhe para pandemisë, bënin mësimin me turne por çfarë do të ndodhë tani që klasat do të përgjysmohen. A ka staf mjaftueshëm për të përballuar mësimin?
-Ministria e Arsimit nuk e ka hequr mundësinë e mësimit online, të cilin e ka në plan në rast mbyllje shkollash nga infeksionet, por nuk po bën asgjë për ta bërë funksional këtë mësim, nisur nga eksperienca zhgënjyese e karantinës. A ka një plan të qartë nëse mësimi kthehet online?
-A ka nisur higjienizimi i shkollave? Ndërsa ministrja u bëri thirrje bashkive që të nisin menjëherë procesin e dezinfektimit, shkolla duhet të kryejë çdo ditë pas mësimit dezinfektimin e ambienteve.
-Deri më tani nuk është akorduar një fond për buxhetin e arsimit, ndërkohë që shkolla nis në pak javë.
/Iconstyle.al
